Batang Krian dalam Jerita: Iban vs Bansa Seru

Bansa ka dulu nguan menua batang Krian iyanya bansa Seru.  Nyadi bansa Seru angkat an Ulu Babu di Rimbas lalu nyeliah ka diri ari Iban, laban Iban nyau mayuh-semayuh nguan Batang Rimbas. Tambah mega Iban jampat agi berimba temuda laban Iban bumai, enda baka Seru ka ngarapkan mulung enggau pantu babas ka diempa.

Ari Ulu Babu di Rimbas bansa Seru lalu diau ka Ulu Asam pati Melupa simpang Batang Krian.  Lebuh Seri berumah di Ulu Asam nya baru Seru enggau Iban berengkah ngayau pangan. Sebedau tu Seru nelap amat enggau Iban Rimbas, iyanya peturun ari Padang. Lama bendar sida bemunsuh ngelaban pangan nyentuk ngagai tubuh sida Rakaya Antau Linggang Nengri seduai adi iya Gun Mangku Bumi, ti nyadi tuai megai Batang Rimbas kejang ngagai deka datai Rajah James Brooke di Sarawak dalam 1839.

Nyadi sakali nyau datai ha tubuh uchu Demung ka benama Belaki jadi tuai Iban, lebuh iya bumai di Tanjung Kundong dalam Paku, iya empu, bini iya Beremas enggau ipar iya Kadir, sama parai kena bunuh Seru lebuh sida tiga mantun. Penatai Seru tu an Bukit Engkalat dalam Krian. Ari nyin sida nyemerai Batang Rimbas enggau Bayur lalu betiki ari Nanga Ulai nuju Bukit Tampak Panas. Ari nya sida ngilu ka Pangkaru alah datai ka nanga, lalu ngili Paku alai datai di Tanjung Kundung ari ili Nanga Anyut. Semua menua kena pansa sida nya tadi apin bisi Iban nuan, tang agi kampung dalam magang.

Pala Belaki lalu ulih ditabanka Seru rari. Lebuh sida begau, meda munsuh udah nyau alai Jimbai, Umar, Jelema enggau Buma lalu nitihka sida. Laban beguai nitihka munsuh empa pengering Jimbai datail ba ai Samu lalu diperejuk iya datai di seberai. Sida lalu nitihka munsuh ngulu Paku, datai di Nanga Pangkaru lalu nguluka nya. Datai sida di Nanga Sungai Kara sida lalu niki ka Bukit Taju Baketan lalu ninting ngagai Bukit Tampak Panas.

Datai ba Bukit Tampak Panas nya baru sida betemu enggau Seru benung niki buah engkeranji padi. Nyangka nyau lapar kini bala Seru nya, udah lama rari. Jimbai ka dulu bisi meda Seru siku dugau-dugau jadi wan ai duduk ngantuk, lalu dentakka Jimbai enggau sangkuh lalu parai dia. Munsuh pan lalu pambar alah, nadai ngelaban. Nyadi sida Jimbai enda tulih ka pala mayuh, laban sida tembu belulung ka munsub ka niki buah engkeranji padi. Semua pala ulih sida ka tiga igi aja. Munsuh rari, sida enda tetitihka agi, laban nyau ikak nadai makai.

Nyadi pala Belaki berayan enda agi ulih taban ka munsuh rari, laIu ditumbakka sida Jimbai ba pun tapang ka dikumbai Tapang Panas, Tembu sida numbak ka pala Belaki, dia sida baum madahka tapang panas tu lalu ka pesaka uchu ambu sida ka begau ka penusah tu.

Nya alai bala anembiak Repun Betuah, Akin enggau Radin ka berimba menua Bayur enda berimba Sungai Randau laban nya dikumbai empa Iban Paku, tang maya Raja Charles Brooke, orang Paku enda tau bempu menua nya agi laban jauh ari menua sida.

Penghulu Dalam Munan

Nyadi Munan tu beberita ukai ketegal iya ngelaban perintah, tang ketegal iya mantu perintah ngaluska pengachau di menua Sarawak.  Enti dipeda ari segi patriotisme Munan tu kurang, lalu enda sebaka enggau pengawa sida Bantin tauka Ngumbang tauka jauh amat baruh enti dibandingka enggau Rentap aki bini iya Subang anak Layang .  Tajapan Munan tu asal iya ari Paku, udahnya mindah ke Awik nya baru ke Sibu, tang tau mega kitai ngumbai iya tuai Iban ili Batang Rajang laban iya bulih penampak sepengudah iya pindah ke Sibu.

Munan tu anak Penghulu Minggat seduai Jara ari Awik, Krian, Saratok.  Iya ada di Paku, sebedau sida iya sebilik pindah ke Awik, lebih kurang dalam taun 1854.  Dalam taun 1890 iya enggau apai iya Penghulu Minggat pegi ke Sumatera, alai apai ia parai di Panai.  Munan bebini ngambi Subang ka diau di Entabai, Julau.  Nyadi Subang tu anak iru Tambong seduai Layang, lalu uchu Libau “Rentap” tuai Iban Skrang ka nan di Bukit Sadok (1853-1861: Jerita Rentap mega agi dalam pansik aku).  Entua Munan iyanya Layang, menantu Rentap ka munuh Tuan Allan Lee di Lintang Batang, semak nanga  Skrang dalam taun 1850.

Dalam pengidup iya Munan bisi tujuh kali matak kayau, semua kayau tu endang diasuh Tuan Raja.  Tang tiga kali kayau iya ka mujur amat, keterubah iya iyanya ngalahka rumah Penghulu Jimbau di Engkari, ngalahka Bantin seduai Ngumbang di Ulu Batang Ai, enggau ketiga ngalahka Kayan di Ulu Batang Rajang.

Lebuh iya agi biak dia Munan tu bisi mimpi.  Iya bemimpi asai ka bejalai nengah tingkah tebing tinggi ka bebatu.  Nyau pemuaska bejalai dia Munan lalu tepedaka semambu marau, puchuk semambu marau nya nadai temu pengujung di langit din.  “Tarit semambu nya”, pia ka munyi bejaku didinga Munan.  Orang nya tadi lalu madahka nadai siku orang udah tetaritka semambu nya.  Ninga munyi nya, Munan pan madahka diri enda berani nguji narit semambu nya.  Tang, orang nya ngansak iya narit semambu nya.  Meda baka nya Munan lalu narit semambu nya enggau naka tulang iya. Tarit Munan semambu nya, dinga tak lalu bemunyi guntur di langit din naka iya penginggar. “Nya iya, Munan. Ninga nuan munyi guntur nya?”.  Orang lalu madahka Munan “Baka meh Munan, jemah ila nama orang ninga nama nuan, sida iya takut, baka ka takutka guntur” Munan pan lalu tedani.

Lebuh sida Munan datai di Awik ari Sumatera dalam taun 1890, Ampan endang udah dichiri perintah nyadi penghulu nganti Penghulu Minggat.  Nyadi Ampan tu keras bendar deka berimba pulau kampung ka digalau sida Minggat di menua Awik, kenyau ari sida iya pindah kia ari Paku menya.  Munan enggau bala menyadi iya, sereta bala anembiak apai iya Minggat nagang Ampan berimba kampung galau nya , enggai ka nadai alai ngiga rutan, ngiga danan, ngiga kayu ka perau ka guna anak telesak, uchu ambu ka dudi ari ila.  Tang Ampan enda ulih tagang iya.  Meda iya enda alah tagang dia Munan lalu nemuai ngagai Penghulu Garan di Paku enggau Nanang di Padeh deka nanyaka pasal adat tuai ka ngalau pulau.

Lebuh Munan nemuai ke paku enggau Padeh, Penghulu Ampan betemu enggau Residen Bailey ari Simanggang, iya ka maya nya bisi di Kabong.  Ampan  madahka nemuai ke Paku enggau Padeh laban deka minta bantu nanang seduai Garan ngelaban perintah.  Ninga nya Residen Bailey pedis amat ati.

Laban petenah tu Residen bailey lalu manggil Munan betemu enggau iya di kubu Kabong laban iya deka ngusay hal nya enggau Munan.  Munan undur ke Kabong ngena perau panjai dikemuduka Jungan Apai Chaong ari Sebelak.  Meda perau Munan datai dia Tuan Bailey lalu deka nimbak iya ngena dua iti pistol, siti-siti ba jari iya sepiak-sepiak.  Meda pengachau nyau deka nyadi dia Pengiran Matali, kunsil ari Simanggang ka nyempulang penatai Tuan Bailey ke Kabong lalu madah, nadai kebuah belaya.  Enti belaya ko iya, Tuan Residen seduai Munan sama mati.  Manah agi aku ngemai Munan ke Sarawak, nanyaka penemu Tuan Raja, baka ni iya ngaduka hal Munan.

Datai di Sarawak, laban Tuan Raja arapka surat ka dikirumka Tuan Bailey, dia Munan lalu ditan dalam rumah jail enggau nadai pechara.  Malam nya dia iya bemimpi asaika betemu enggau Ranee Magaret, bini Raja Charles Brooke.  Ranee madahka Munan anang irau ati, Raja enda ngukum iya, pagila iya ngelepaska nuan.  Amat mega pagi nya nyangka petara endang agi nyangkung, laban penyalah endang ukai enggi iya, dia urung iya pukul semilan pagi Munan lalu dilepaska Tuan Raja.  Tang Tuan Raja nangka Munan enggau jaku madahka iya nadai kuasa agi di menua Saribas laban iya lama udah bebini nguaika Subang lalu nampung bilik penaik Rentap di  Entabai, Julau.

Di Julau udah nya dia Munan lalu dichiri nyadi Penghulu.  Dalam taun 1890 dia Munan lalu dichirika Raja nyadi Tuai ngayau ngalahka Kayan enggau Kenyah Badang di Ulu Belaga enggau Ulu Balui.  Kejang deka nurun kin dia Munan lalu bisi mimpi.  Iya bemimpi asaika bumai maya nebang, semua kayu udah diengkalung sida iya magang, kelampai sekayu aja agi tinggal apin diengkalung.  Udah nya lalu datai lelaki siku lalu bejaku “Tebang ulih nuan kelampai sekayu tu Munan, awakka semua kayu ka udah diengkalung kira rebah magang ba umai tu”.

Munan pan lalu nebang kelampai ka besai sekayu nya, nama agi deh tak sekejap aja kayu sedandang umai nya rebah magang.  Orang tuai nya lalu madah nya nandaka Munan deka menang ngelaban munsuh.  Nyau datai ba maya ngayau ka bendar dia Muan enggau bala pengayau iya ari Saribas bulih bendar dengah enggau tangkap.

Dalam taun 1895, Munan sekali agi nguluka bala Iban ngalahka bala Kayan enggau Kenyah di ulu Batang Rajang, ketegal sida iya munuh siku Melayu, siku orang Cina enggau bala Iban Saribas.

Maya iya agi di Julau dia menua Ulu Batang Ai agi udu bendar kachau bebunuh ngelaban diri sama diri tauka ngelaban Raja ka duluka Penghulu Ngumbang “Berauh Langit”, Bantin, Penghulu Allam, penghulu Imba enggau Penghulu Ngelingkong dalam taun 1898.  Kena ngaluska pengachau tu dia Tuan Raja lalu ngasuh Munan ngayau bedarat ngalahka Ulu Batang Ai.  Iya matak bala nguluka Katibas lalu melunggang ngilika Lubang Baya ka alai bala iya lalu munuh nhilika Batang Ai datai ke Nanga Kaong.  Maya nya munsuh nadai ngadang iya nuntung datai ari Ulu Katibas, nya alai bala Munan bulih pala lapan belas igi enda nyengkaun tangkap.

Tekenyit amat Tuan Residen Bailey di Simanggang kena pansa sida Munan ka pulai ngayau, sida iya enda ngetu di ba kubu di Simanggang lalu merau meraka tasik pulai ke Sibu.  Berita pemujur kayau Munan tu ngasuh Tuan Bailey pedis agi ati ngagai Munan.

Dalam taun 1902 dia orang di Ulu Engkari di Batang Ai kachau baru nelaban perintah ka betuaika Penghulu Munau apai Laja seduai anak iya Kana. Bantin seduai Kana suah nyerang bala Iban ka semak enggau sida, kelebih agi Iban Lemanak.  Nya alai Tuan Raja lalu ngasuh Munan ari Sibu, Banta ari Skrang enggau Insoll anak Nanang ari Padeh.  Nyadi bala Banta seduai Insoll datai ari Ulu Skrang alah besatup enggau bala Kana ka nan di Rumah Penghulu Jimbau.  Taja sida iya alah Insoll bendar amat ngelaban munsuh, ngenanka bala anembiak iya dataika sida melunggang ngagai menua diri.  Semua anembiak Banta seduai Insoll ka mati lebuh nya bisi tiga belas iku.

Munan ngempuruka bala Iban ili Batang Rajang enggau Iban Kanowit ka betubuh lebih kurang 900 iku.  Bala Munan merau ari Kanowit lalu bedarat nuju Ulu Ketibas.  Datai di Batang Ai, Munan ngemai bala iya ngetu enda jauh ari rumah Penghulu Jimbau.  Bala Munan ka nuntung tu kira tiga ari udah bala Banta seduai Insoll ka alah laban sida.   Rumah Jimbau maya tu padat laban orang Ulu Ai ka nguang kia.

Munan lalu ngemai bala baum milih sapa ka tuai nyerang munsuh, Munan milih tiga iku manuk sabung ka dikarapka iya, sida iya tiga tu Ajah ari Binatang, Ajah ari Entaih enggau Ajah ari Melangan.     Munan sempat nundi sida iya tiga.  “Enti kita tiga enda tulihka dengah siku, badu aku agi ngangauka kita Ajah”, pia ka Munan.

Nyau datai ba maya tengah malam dia Munan lalu ngasuh dua tiga iku anembiak iya engkilaka rumah munsuh, maya nya sida Penghulu Jimbau serumah benung begawai enchaboh arong, ngintu pala bala anembiak Banta seduai Insoll ka udah ulih sida.  Lebuh ka belalai di baruh rumah, engkilaka ulah munsuh dia siku indu pansut ari bilik, lalu bejaku enggau Kana, iya madahka diri bemimpi munsuh deka datai nyerang sida lalu ngasuh Kana besedia.  Ninga nya Kana lalu bejaku “Ni munsuh ka agi deka datai, orang Skrang enggau Saribas udah alah, sida iya udah pulai ngagai menua sida”  pia ka saut Kana.  “Nadai munsuh tau nurun ari langit lalu nyerang kitai” ka Kana nyambung jaku iya ka dulu tadi.  Udah nya bala Munan lalu beguai-guai mulaika diri laban deka madahk nama pengawa enggau ulah munsuh ka didinga tauka dipeda sida.

Ninga munsuh benung begawai enchaboh arong, Munan lalu ngemai bala iya ngalahka rumah munsuh sebedau diniari pagi nya.  Datai di rumah munsuh dia tiga iku manuk sabung Munan ka bela benama Ajah enggau tujuh iku ka bukai, nyengkaum Banyi apai Ibi ari Julau matak serang nengah ruai.  Laban ari ka agi pagi bendar, sereta mayuh munsuh nyau buntau sereta mabuk dia mudah bendar bala Munan ngalahka sida.

Nyadi bala Munan ka bukai tu tadi ngipa munsuh ka rari ari pala tangga, ari tanju tauka ari ujung bilik.  Dalam serang tu bala Munan bulih lima puluh tiga igi pala enggau lima iku tangkap, tang Penghulu Munau enggau anak iya Kana sereta engau menyadi indu Kana ulih ngerarika diri.  Bala Munan ka mati semina dua iku aja.

Dalam bulan Tiga, taun 1904 sekali agi Munan nguluka bala betempuh enggau bala Bantin seduai Kana endur ka benama Wong Adai di Ulu Entabai.  Dalam kayau Bantin seduai Kana mega alah, lapan belas anembiak seduai iya mati.  Udah ka alah tu Bantin lalu ngemai bala anembiak iya rari bukit ka dikumbai Mikai Pambar antara menua Sarawak-Kalimantan, ka kena pegai perintah Belanda di Indonesia.  Nyadi Kana taja pan iya bisi kena timbak bala Sarawak Renjer, tang iya ulin ngerarika diri.  Kayau Munan ka sekalai tu mega dikumbai “Kayau Bongkap” laban bala Bantin ngayau ngena perau pengayau ka digelar bongkap.

Dalam bulan Lima, 1907 dia Bantin enggau bala tuai-tuai Iban Batang Ai enggau ulu Batang Rajang ka selalu angkat ngelaban perintah lalu besetuju bebaik enggau perintah sereta bala Iban ili Batang Rajang enggau ili Batang Lupar.  Pengawa bebaik tu diatur di pasar Kapit.  Penghulu Dalam Munan nyadi wakil Iban ili Batang Rajang bebaik enggau sida Bantin.  Nyadi Raja Charles Brooke empu enggau Residen Charles Hose nyadi saksi pengawa bebaik tu ngarika perintah Sarawak.

Kena 31 ari bulan Lapan taun 1908 sekali agi Penghulu Dalam Munan diasuh Raja nguluka bala perintah ngayau ngalahka Bantin di bukit Mikai Pambar. Kena pegai perintah Belanda di Indonesia. Sebedau nurun ngayau dia Munan bemimpi bejalai nisi rumah panjai orang, lebuh iya mansa mua penyenguk dia siku indai tuai orang ngeludahka rampang pinang iya lalu kena baju Munan.  “Oh kasih meh nuan Munan, ukai sengaja aku deka ngeluaka rampang pinang kena nuan Munan” pia ko indai tuai nya.  Indu nya madah ka Munan. “Ba kayau nuan ka sekali tu ila Muan nuan deka telih laban munsuh” .  Udah nya indu nya lalu madahka diri Indai Abang ari Gelong.  Munan pan lalu tedani.  Datai ba maya ka ngayau tu dia datai di Nanga Delok bala Munan bebai dua, sebagi nguluka Delok lalu sebagi agi nguluka Jengin.  Amat sida iya nanad tentu besatup enggau munsuh tang laban udah disumpah antu, maya ka ngalahka Bantin di Mikai Pambar tu, dia Munan telih ba pah iya kena tumbuk munsuh ka benama Jugu, siku ari manuk sabung Bantin ka berani sereta kebal.

Kena ngujungka cherita Munan, kitai pulau ke pun baru.  Dalam taun 1903, ketegal pemanah pengawa iya ba perintah, sereta pemerani iya nguluka kayau ka diasuh perintah dia Munan lalu diasuh perintah pindah ari Julau lalu diau di Pulau Kertau semak Sibu.  Enda lama udah nya iya lalu diberi pangkat nyadi Penghulu Dalam (Great Chief).  Tu pangkat tuai Iban ka pemadu tinggi maya nya kelia, iya diberi gaji bulan sereta bisi opis di Sibu.  Nambahka nya ketegal peneleba enggau pengelandik  iya ngiring rayat sereta  dipebasaka orang ba pelilih menua ili Batang Rajang dia Munan lalu dipilih nyadi kaban penuh Kunsil Nengeri dalam taun 1906, nganti Pengarah Ringkai ari Rantau Anak, Betong.   Munan nyadi kaban Kunsil Nengeri nyentukka iya mati dalam taun 1914, di Sibu.  Iya dikuburka di Pulau Kertau, Sibu.

Jaku Kenang:  Dia tu aku beratika, nama kabuah perintah maduka Munan diau di Pulau Kertau, Sibu.  Kabuah iya, ngambika perintah Brooke nyamai ngemataka ulah iya, takutka angkat ngelaban perintah.

Panglima Mujah Buah Raya

Mujah “Buah Raya” tu siku tuai kayau Iban ka beberita di Entabai, Julau ari taun 1840-an ngagai taun 1860-an.  Ketegal pemerani sereta pengelandik iya nyadi tuai dia Sharif Masahor di Mukah lalu meri iya pangkat Panglima. Panglima Mujah tu anak Melina “Bunga Ringkai” datai ari Skrang.  Niang Apai iya Melina “Bunga Ringkai” endang tuai kayau Iban Skrang ka suah matak kayau ngalahka Melanau di Oya, Mukah enggau di Balangian serambau enggau penatai James Brooke ke Sarawak.

Kira-kira dalam taun 1840 dia iya matak bala pindah ke Saribas lalu diau enda lama di kaki Bukit Sadok, lalu bumai berimba menua ulu Spak.  Lebuh iya diau di Spak dia iya suah nemuai ngagai tuai-tuai Iban Saribas baka sida Igoh apai Lamban di Ulu Layar, Unal “Bulan” di ili Spak enggau Orang Kaya Pemancha Dana “Bayang” di Padeh, ari penemuai tu meh iya belajarka adat beburung enggau chara-chara ngayau.  Udah bulih penemu kena ngayau dia Mujah lalu berunding, nadai guna iya terus diau di menua Saribas laban udah  mayuh tuai kayau diau di Saribas.  Dia iya lalu berunding deka matak bala pindah ngiga menua baru.

Nyau kepuas ka berunding dia Mujanh lalu nemuai ngagai Encharang ka diau di Ulu Anyut, dalam Paku.  Iya diau enggau sida Encharang bisi beberapa ari, nyau kepuas ka dia dia iya lalu nanya Andak, anak dara Encharang ka bini iya.  Encharang setuju enti Mujah deka nguai lalu diau enggau sida di Ulu Anyut, ba endur ka diatu dikumbai Tembawai Tingkah.  Mujah pan jadi enggau Andak lalu diau di ulu Anyut.

Lebuh ka berandau enggau orang di Anyut dia Mujah madahka kabuah iya pindah ari Skrang ke Spak laban deka berimba menua baru, namabahka pemayuh temuda rimba bansa Iban.  Taja pan iya rindu ba pengawa ngayau tanh iya enda setuju enggau chara tuai-tuai Saribas baka sida Igoh apai Lamban enggau Unal “Bulan” ka semina rindu ngemeranka pengawa ngayau tang nadai ati deka ngemesaika menua, tanah temuda, bali rimba bansa Iban ka tau alai bumai kena ngidupka diri.

Dalam randau iya Mujah lalu madahka deka nyadi tuai kayau tauka manuk sabung, tang ka beguna agi ari nua ka iya iya deka ngemai bala Iban pindah ngiga menua baru, ari luar menua Saribas, Skrang enggau Batang Lupar ka udah diuan mayuh Iban.  Nya alai ka iya sida iya patut enggau iya pindah berumpang menua ulu sungai Entabai enggau sepemanjai sungai Kanowit ka besabung enggau menua ulu Layar.  Kenu ka Mujah laban menua nya agi puang, semina udah diuan bansa Baketan ka pindah ari Paku enggau Batang Krian.

Nyadi bala orang Anyut enda ulih diumbuk Mujah, sida iya enggai ninggalka menua lama.  Bala sida bini iya sebilik mega enggai enggau Mujah pindah.  Andak ukai semina enggai enggau pindah tang minta sarak.  Seduai iya lalu sarak, tang laban penyarak nya ukai ari laya, nya alai seduai iya sarak sempekat semina betukar tinchin aja.

Udah sarak enggau Andak anak Encharang di Anyut, Mujah deka bebini baru ngiga indu ka deka enggau iya pindah ke Entabai, sekali tu iya nanya indu orang di ulu Matopdalam Paku mega.  Taja pan Mujah lelaki ka sigat sereta beberita berani, tang nadai siku indu orang Paku ngilika Anyut sanggup jadi enggau Mujah pindah ngagai menua baru, laban maya nya kelia menua Entabai nya dikira jauh ari Saribas.  Mujah enda jera, ka sekali tu iya nanya indu orang Penom ka benama Mapong, dalam Paku mega, tang kesekali tu mega jelungan baru, laban Mapong mega enggai nitihka iya pindah ke menua baru.

Nyau datai ba maya ka pindah dia Mujah lalu nguluka bala iya iyanya Iban ari Saribas, Skrang enggau Lemanak, sida iya bedarat nengah tatai Keladan lalu nuju bukit antara entigis ulu Ngiau enggau Jaloh,  enggau antara Jaloh enggau Penom.  Ari bukit nya sida iya lalu bejalai nuju bukit ka nyerara menua ulu Layar enggau Entabai.  Sida Mujah lalu berumah dia, lebuh sida iya diau dia sekeda bala Iban ari Ulu Layar lalu enggau sida.  Maya tu Igoh apai Lamban tuai serang ari Ulu Layar lalu nyerang bansa Beketan ka diau ba endur nya.  Mujah empu mega siku ari tuai serang maya nya.  Udah dialahka Iban dia bansa Beketan ka diau di ulu Entabai, ulu Julau, ulu Entaih enggau ulu Kanowit lalu rari, mindah diau begelumu ba siti genturung pendiau di ili Kanowit.

Udah ka ngalahka bansa Beketan dia Mujah lalu matak anembiak iya pindah ke ili ka agi.  Sida iya lalu berumah di Nanga Engkaup.  Udah betaun-taun diau di Engkaup dia Mujah enggau bala iya lalu deka pindah ke ili ka agi.  Tang sebedau sida iya pindah Mujah ngasuh sekeda ari anembiiak iya dulu kin matau menua nya, laban maya nya agi siga Beketan.  Sida iya dulu matau menua ka dikumbai Nanga Namangu ka deka alai sida iya berumah.  Maya ka matau menua tu bala Mujah tinduk di perau takutka diserang bansa Beketan.

Udah sida iya tembu berumah di Nanga Namangu nya baru sida iya pulai ke Engkaup ka baru ngambi bala indu anembiak.  Datai sida di Engkaup dia sida meda mayuh bala orang datai baru deka nitihka sida iya pindah ke menua baru.  Lemai nya Mujah lalu ngemai bala anembiak iya baum, maya nya iya mantah chara tuai-tuai Iban Saribas ngayau ngalah ka mayuh endur datai ke Sambas enggau Pontianak di Kalimantan, sida iya semina munuh munsuh enggau ngerampas sekeda barang ka berega tang enda lalu diau dia lalu beempu menua nya.  Buah Raya nangkan bala iya, enda ngasug nunda chara kayau tuai-tuai ari Saribas.  Maya nya mega Mujah lalu ngasuh bala iya ngaga perau pengayau ka besai kena sida iya ngalahka munsuh di menua baru.  Mujah madahka anembiak iya, Enti Kumang ka betemu enggau iya dalam mimpi agi nulung iya, menua Kanowit ulih diempu bansa Iban.

Udah perau pengayau sida iya tembu dia Mujah enggau bala manuk sabung iya lalu nemuai Paku enggau Layar minta besi kena ngaga sangkuh enggau senyata ka bukai.  Kenu ka Mujah, ngena senjata tu sida iya ngalahka munsuh, enti munsuh udah alah menua nya mesti diempu Iban ari Paku, Layar, Skrang enggau Lemanak.  Kenu ka Mujah menua Kanowit tu ulih diempu sida enti sekumbang ka nya iya enda nyerang bansa bukai di luar menua Kanowit.  Api lama iya udah pulai ari Sarubas dia Uyu apai Ikum ari ulu Julau lalu nemuai ngagai iya.  Nyadi Uyu apai Ikum tu endang manuk sabung Mujah, tuai Iban ulu Julau ka tau serang, iya suah nyadi manuk sabung O.K.P Dana “Bayang”, Ajee, enggau O.K.P Nanang.  Uyu nemuai ngagai Mujah laban deka nanyaka kati bala Iban bisi munsuh di menua baru.  Mujah madah bala Beketan Julau udah diau di ulu Sugai, lalu sida iya enda ngachau bala Iban ka baru pindah kia.  Mujah madahka Uyu apai Ikum semina Beketan ka diau di sepemanjai sungai Julau, Binatang , Nyelong enggau Sarikei aja tau dikayau.  Udah nya bala Mujah enggau Uyu lalu besikap ngayau Beketan.

Udah dua malam di rantau jalai dia sida iya lalu datai di Nanga Julau, dia sida iya lalu nyerang ngalahka  munsuh ka enda besedia.  Sida bulih mayuh dengah enggau tangkap. Udanya bala Mujah lalu ngalahka rumah bansa Segalang enggau Rajang dalam Kanowit.  Ka sekali tu  mega bala Mujah “Buah Raja” bulih mayuh dengah enggau tangkap.  Pulai nya Buah Raya lalu ngemai bala iya niri ka gawai Enchabuh Arung.

Udah menua Kanowit, Julau enggau Entabai diempu bansa Iban, Mujah suah matak kayau ngalahka bansa Lugat, Beketan, Rajang seru enggau Melanau tungga ke barat laut nanga Batang Rajang.  Ketegal pemujur Mujah ngalahka bansa bukai nya alai diatu  menua Kanowit, Julau, Sarikei, Sibu engau Bintangor diuan mayuh bansa Iban ari Lemanak, Layar enggau Skrang.  Kelimpah ari ka ngalahka bansa bukai di Kanowit, Mujah mega suah nulung Unggat seduai Gerinang ngalahka munsuh sida bansa Lusum di Ulu Batang Rajang enggau Balleh, awakka menua nya ulih diempu bansa Iban ka pindah kia ari Batang Ai enggau ari Batang Kanyau di Kalimantan.

Orang Kaya Pemancha Nanang

Nanang tu anak tuai O.K.P. Dana “Bayang”, iya bebini ngambi Rabai anak Orang Kaya Penglima Randi ka bensumbar “Rantai” sama sida iya di Padeh, Layar.  Entua iya Orang Kaya Penglima Randi mega raja berani Iban Saribas ka serambau enggau apai iya O.K.P. Dana “Bayang” ka mati dalam taun 1854.  Udah Ajee mati ngelaban bala Raja di Sungai Langit dalam taun 1858 dia  Nanang lalu nganti Ajee nyadi tuai Iban Padeh enggau Ulu Layar.

Maya iya agi biak dia Nanang bisi mimpi.  Iya bemimpi asaika niki Bukit Santubong lalu betemu enggau Kumang. Kumang ngemai iya tama ngagai bilik peninduk iya lalu madahka jemah ila nadai orang ulih ngalahka Nanang dalam kayau.  Dalam mimpi iya nya mega Nanang asai ka meda tiga iti panggau peninduk.  Panggau ka sepiak kanan nya peninduk nuan Nanang, iya ka tengah nya enggi aku lalu ka ari kiba nya enggi Ngumbang Brauh Langit.  Kumang madahka Ngumbang mega enda ulih ngalahka Nanang laban panggau peninduk iya ari kiba Kumang.  Udah nya Nanang pan lalu tedani.  Kelimpah ari mimpi iya nya,  Nanang mega bisi bemimpi diberi Kumang enggau indai iya mandi, dia indai Kumang madahka Nanang deka berani, sebaka enggau sida Keling sida Laja ari Panggau Libau.

Udah Ajee mati di Sungai Langit Luyoh undur ke Mukah lalu berunding enggau Sharif Masahor iya ka maya nya endang bisi ati deka angkat ngelaban perintah Brooke lalu muru semua orang Erupa ari tanah Sarawak.  Sharif Masahor lalu besetuju nyendiaka bala enggau senjata ka dikena Luyoh ngelaban perintah.

Udah ka berunding enggau Sharif Masahor di Mukah, Nanang seduai Luyoh lalu nirika kubu di Nanga Spak, ditu seduai iya ngenan deka ngelaban perintah bebalaska pemati adi seduai iya Ajee. Kenu ka Datuk Edmund Langgu, Ajee @ Saji tu ukai adi tang anak tuai Dana Bayang.  Dalam taun 1858 kubu nya lalu alah diserang Tuan Watson enggau Panglima Bakir sereta Abang Aing.  Sebulan udah ka alah di Nanga Spak, Nanang nirika kubu baru, tang alah mega diserang bala Tuan Watson enggau bala Bakir ari Kubu Lily di Betong.

Udah ka alah dua kali ngelaban bala perintah dia Nanang seduai Luyoh lalu badu agi ngelaban perintah di tanah rata. Seduai iya lalu ngulai Rentap di Bukit Sadok dalam taun 1858.  Bedil besai “Bujang Timpang Berang” ka ulih apai seduai iya di Sambas berapa puluh taun ka udah lalu dibai seduai iya ke Bukit Sadok.

Ari kuta di Bukit Sadok tu Nanang seduai Luyoh nguluka bala seduai engau bala Rentap nulung Sharif Masahor ngelaban perintah di Mukah.  Seduai iya nampak bendar nulung Sharif Masahor betempuh ngelaban bala perintah di Mukah enggau Igan.

Dua bulan sepengudah Sharif Masahor diburu perintah ke Singapura dalam taun 1861 dia Tuan Raja enggau Tuan Muda Charles Brooke nguluka nguluka bala besai ngalahka Nanang seduai Rentap di Bukit Sadok.  Laban ka udah enda mujur ngalahka Sadok dua kali dulu ari tu dia bala Raja lalu tulihka runding ngemai meriam besai ka digelar sida “Bujang Sadok” kena nganchurka kubu Rentap.

Bala Raja nguluka Batang Layar ngagai Nanga Tiga.  Ari nya sida iya nguluka sungai Tiput, muntang Spak lalu nuju Bukit Sadok.  Datai di kaki Bukit Sadok dia bala sida lalu baum, Tuan Besai seduai Tuan Muda Charles Brooke madahka perintah nadai ati deka bemunsuh enggau Nanang seduai Luyoh, perintah deka ngampunka seduai enti seduai iya deka nundukka perintah.  Tang Rentap enda ulih diampunka perintah laban iya udah bepenyalah munuh Tuan Allan Lee di Nanga Skrang beberapa taun dulu ari nya. Tambah mega Rentap sigi enggai bebaik enggau Raja Putih, taja pan perintah kala mujuk iya nundukka perintah ngelama tu.

Ninga penemu Tuan Besai enggau Tuan Muda munyi nya dia bala Iban Saribas lantang ati.  Laban enti nitihka ati sida endang enggai bemunsuh enggau diri sama diri.  Bala tuai-tuai Iban besetuju milih Jabu apai Umping engau menyadi iya Ngadan apai Rembi betemu enggau Nanang seduai Luyoh di Bukit Sadok.

Jabu seduai Ngadan pan lalu niki ke Bukit Sadok.  Datai din seduai iya madahka jaku perintah Brooke ngagai Nanang seduai Luyoh.  Seduai iya madahka diri setuju nundukka perintah, enti jaku nya ukai semina kena nipu seduai iya aja. Udah Nanang enggau Luyoh enggau bala seduai  berunding enggau panjai dia seduai iya lalu ngemai semilan iku manuk sabung ka dikarapka seduai betemu lalu berunding enggau bala Raja di kaki Bukit Sadok.  Datai din dia Tuan Besai seduai Tuan Muda ngasuh seduai iya nyerahka 400 tajau rusa tauka pulai ngagai mata duit $3,200 ngagai perintah ambika jamin seduai iya enda ngaga pengachau.  Enti seduai iya nadai ngaga pengachau ngelaban perintah dalam kandang tiga taun ka deka datai perintah deka mulaika tajau seduai nya.  Nanang seduai Luyoh pan setuju, lalu ngasuh Uyu apai Ikum nyuaka tajau nya ngagai perintah. Udah bala perintah lalu ngalahka Rentap di Bukit Sadok.  Sadok pan lalu alah, tang Rentap dataika mati nadai kala ngaku diri alah.

Sebedau ninggalka Bukit Sadok dia Tuan Besai lalu ngempuruka bala tuai-tuai Iban Batang Layar, Paku enggau Skrang.  Maya tu Tuan Besai madah perintah badu agi belaya enggau Nanang, Tuan madah Nanang nadai munsuh agi, enti Raja nadai munsuh, lalu Nanang enda tau ngayau agi enti enda dibai Tuan Raja.  Tuan Besai lalu nangkan bala Iban enggau jaku, enda ngasuh sida agi bekayau pangan diri, lalu kemeranka pengawa bumai betupi enggau dagang.  Udahnya Tuan Besai lalu ngatur pendiau sida Nanang menyadi.  Nanang asuh iya diau di Buluh Antu, Padeh.  Luyoh diau di Sungai Langit di Ulu Layar.  Nya meh baka, seduai udah nunduk, alai pendiau pan Raja ngatur.

Ba pun taun 1863 dia Tuan Muda lalu ngemai tuai-tuai Iban Saribas baka Nanang ari Padeh, Linggir “Mali Lebu” ari Paku, Pangelima Bakir ari Betong, Minggat apai Runai seduai Chulo “Tarang” ari Awik enggau Krian ngayau ngukum bansa Kayan enggau Kenyah di Ulu Batang Rajang laban sida iya  ngelalaika Sawing seduai Skalai ka rari kin udah ka munuh dua iku pemesai orang putih di Kubu Emma, Kanowit.

Nya alai pulai ari ka ngayau Kayan-Kenyah di Ulu batang Rajang dia Tuan Muda lalu ngempurka semua tuai-tuai kayau dalam menua bagi kedua baum di Kubu James di Nanga Skrang.  Maya ka baum dia Tuan Muda lalu meri besai terima kasih ngagai bala sida kelebih agi ngagai Nanang ka udah nunjukka pemerani iya sereta penaluk iya ka perintah sepengudah seduai iya Luyoh nunduk di Bukit Sadok kena 25 ari bulan Semilan, 1861 suba.  Maya tu mega perintah lalu mulaika 400 tajau rusa iya ti ka jamin seduai iya suba ngagai seduai iya baru..

Dalam taun 1886 dia perintah lalu meri pangkat Orang Kaya Pemancha ngagai Nanang, sama enggau pangkat niang apai iya Orang Kaya Pemancha Dana “Bayang”.  Maya tu mega Bunyau apai Bakir lalu diberi pangkat nyadi Pengarah, iya Iban ti keterubah diberi pangkat Pengarah.  Pengawa tu dipenyadi di Kubu Lili di Betong.

Dalam taun 1879 dia Tuan Maxwell, Residen Simanggang lalu ngasuh Orang Kaya Pemancha Nanang ari Padeh nguluka bala perintah mega dibantu bala  Minggat seduai Chulo Tarang ari Kalaka, enggau Jabu seduai Utik ari Bangat, Skrang ngalahka Kedu “Lang Ngindang” tuai Iban Skrang di Nanga Bunu.  Dalam kayau tu dia menyadi Nanang enggau anak menyadi iya Senabong seduai Timban anak niang Ajee bebendar amat laban ngingatka niang apai seduai ka udah dipumpung orang Skrang di Sungai Langit dalam taun 1858 suba. Tang Senabong seduai Timban mega enda panjai umur, seduai iya mati di Sabah maya pegi ngiga pengaruh kena bebalaska pemati apai seduai. Siku mati pedis perut lalu siku mati diempa baya.

Dalam taun 1886 nya mega Nanang sekali agi dikarapka perintah nguluka bala ngalahka Ngumbang seduai Bantin tuai Iban Ulu Ai ka angkat ngelaban perintah kenyau ari taun 1882 suba.  Nanang ngluka bala Raja ka betubuh lebih 12,000 iku ngayau Bantin seduai Ngumbang di endur ka dikumbai Kedang di Kalimantan, Indonesia ka kena pegai perintah Belanda.  Maya kayau tu bala perintah munuh dua puluh iku anembiak Bantin seduai Ngumbang lalu nunu lebih lapan puluh buah rumah panjai Iban ngelingi nya dia.

Dalam taun 1898 taja pan udah tuai agi mega perintah ngarapka Orang Kaya Pemancha Nanang nguluka bala perintah nyerang Iban di sungai Yong enggau Cheremin di Ulu Batang Rajang.  Tu meh ka penudi Nanang nguluka bala perintah ngayau.

O.K.P. Nanang tu keterubah tuai Iban Saribas masuk pengarap Kristian.  Dalam taun 1891 dia iya lalu dipilih perintah nyadi kaban penuh Kunsil Nengeri menua Sarawak ngarika bansa Iban datai ka iya mati dalam taun 1902 lalu dikuburka di Pendam Terusu di Padeh, Layar berimbai enggau kubur niang apai iya O.K.P. Dana “Bayang” enggau menyadi iya Ajee apai Limpa. Kelimpah ari Ajee seduai Luyoh  menyadi lelaki iya ka bukai baka Buda seduai Unting sama nyadi katekis (catechist) enggau Gerija Kristian Anglika.

13 Bengkah Mimpi Tuai Iban- Mimpi Minggat

Nyadi Minggat tu siku tuai Iban Paku ke nguluka anembiak pindah mungkal Batang Awik, pati kiba Krian. Iya tau serang, lalu suah bendar nyerang ngarika bala Rajah. Nambahka iya tau serang, Minggat mega pemegi, pemulih tajau, datai ka parai di Panai, Sumatra, seberai tiban Nanga San.

Nyadi sakali sepi Minggat dalam mimpi, iya asai ka bejalai. Lebuh iya bejalai iya betemu enggau orang siku ke ngasuh iya bebini indu nama Jara. Lebuh orang nya nyebut Jara, kenaya indu nya pan bisi ga dipeda iya. Dani iya pagi, ati iya irau bendar ka mimpi diri, laban dalam Batang Paku rambau nya, nadai indu benama Jara. Lalu pia mega maya nya, Jara di Suri, Rimbas, pan bisi ga mimpi, diasuh orang belaki lelaki nama Minggat.

Nyau kepuas Minggat ke tusah ati ka mimpi diri, han siti iya bejaku enggau apai iya Lua, madahka diri bisi ati deka nemuai, seraya ke lalu ngiga manuk sabung. Apai iya pan ngasoh, iya pan lalu nurun ga ka Rimbas.

Seari-ari nya iya bejalai alah datai di Suri pati Rimbas, antara enggau Paku. Ba rumah orang Suri iya lalu niki. Rumah puang bendar dipeda iya, laban maya nya, maya orang gawa umai. Datai iya di tengah rumah iya lalu duduk, laban dia apai tuai siku bisi nuduk ka iya. Apin lama udah iya duduk, alai apai tuai ngangau:

“0 Jara, anjung baku ari bilik,” ko iya. Ninga nya tekenyit bendar ati Minggat, ko ati iya, “Mujur bendar pejalai aku tu kau.” Udah nya pansut Jara, dara, suman bendar baka kelemayang indu ke dipeda Minggat dalam mimpi iya suba. Baku lalu diengkah iya di ruai, iya lalu pulai ka bilik baru.

Hari pan nyau lemai, alai Minggat nurun mandi ka ai. Udah pulai iya mandi, iya duduk baru enggau apai Jara di ruai. Apin bengat lama seduai udah berandau, alai Jara ngumbai rnakai. Udah tembu makai, baka selama mega, orang serumah nya bela datai magang ngulu temuai, indu enggau lelaki sampal bendar datai dia.

Nyau terentak datai magang orang ka ngulu iya, orang nanya ka nama iya, enggau nama panemuai iya ngagai rumah sida. Minggat madah ka diri datai an Karangan Pinggai dalam Paku, lalu kabuah iya kia padah ka iya pejalai lantang ngiga manuk sabung.

Ninga iya nyebut narna diri Minggat, peda iya Jara nelai indu siku ke duduk berimbai enggau iya, madah ka diri bisi udah ngambi lelaki nama nya mimpi. “Tak baka gamal iya nya, gamal lelaki ka diambi aku mimpi,” ko Jara nelai indu siku ka semak iya.

Ninga Jara nelai indu ke benimbai enggau iya duduk, ati Minggat berunding bendar. Iya belemati ka pangamat mimpi diri. Udah nya sekumbang iya ke berandau enggau orang, ati iya nyau enda ulih bai iya lama berandau. Iya madah ka sida, diri lelak bendar bekau bejalai sahari nya.

Ninga iya madah ka diri 1elak, orang ti ngulu, pulai magang ngagai ruai ngagai bilik diri. Sereta udah pulai orang, alai apai Jara lalu ngadu ka endur Minggat tinduk ba pantar sida. Udah tembu nya alai apai Jara pulai ka bilik, tang lebuh iya tama Minggat meda ka sakali ka iya nambit pintu enggau enda. Meda iya enda nambit pintu Minggat lantang ati, iya tama ka bilik semina enda tak nyereta apai Jara, mansang ngayap ngagai Jara ke sadau.

Datai iya ba peninduk Jara di sadau, iya lalu ngerak iya. Dani Jara lalu nanya ka sapa orang ke ngayap? Iya madah ka diri Minggat. Seduai pan lalu berandau. Nyau kepuas seduai berandau alai Minggat madah ka diri deka bebini Jara, laban ko iya, antu udah madah ngagai iya dalam mimpi ngasoh iya jadi enggau indu nama Jara. Ninga jaku Minggat, Jara pan lalu madah ka diri bisi mimpi, diasuh antu deka belaki ditepat lelaki nama Minggat. Seduai sama arapka mimpi pangan. Nyau ka lama seduai udah bejaku, Minggat pan enda berasai lalu tinduk. Apin lama iya udah tinduk, endur iya meda bintang tak baka ke diaraka di kebung langit. Dani iya, malik peda agi ga bisi bintang. “Ni atap kita,” ko iya nanya Jara. “Dia meh atap,” ko Jara. “Nama nyin bintang ayan deh?” ko Minggat. Seduai lalu sama bediri ngama atap, lalu atap pan bisi ga kena pegai seduai. Sereta seduai tepegai ka atap bintang lesap ari peda seduai.

Alit bendar ati seduai meda utai nyelai baka nya. Seduai pan lalu sama tinduk baru. Lebuh tinduk tu, Minggat bemimpi baru asai ka betemu enggau orang ka betemu enggau iya dalam mimpi suba. Ko orang nya nganu iya, “Tu meh indu ka diasuhaku ambi nuan ka bini. Baka seduai ka engkadah bintang tadi, baka nya ga orang engkadah rita anak telesak seduai.” Minggat pan lalu dani.

Nyadi malam iya ka baru udah jadi enggau Jara, Minggat bisi mimpi baru munyi tu:

Iya asai ka engkadah ka langit. Lebuh iya engkadah peda iya bintang tak ngenjing baka ka di-ara, ngenjing terang langit laban bintang. Benung iya ngemataka bintang dinga iya bisi orang ngangau ka iya munyi tu: “Baka nya ga nuan Minggat, ngemayuh bintang nya orang nitih ka nuan ila.”

Udah iya mimpi nya, malam nya iya tinduk baru. Lebuh iya tinduk tu, iya asai ke mimpi bejalai niti jalai besai bendar. Nyau ka lama udah iya bejalai, endur iya asai ke niki bukit. Datai di tuchung bukit, peda iya bisi rumah orang sabuah dia, iya pan lalu niki ka rumah. Datai di rumah, iya lalu asuh orang duduk. Lebuh iya duduk, peda iya mayuh bendar orang. Semua orang ke dipeda iya mai iya pansut ke tanju, iya pan lalu pansut enggau sida.

Datai di tanju, ka apai tuai siku, “Peda nuan asap nyin Minggat.”  “Asap utai apa nya?” ko iya nanya. “Eh, nyin asap rumah munsuh tunu Dana, nyin asap tunu Linggir, nyin enggi Rentap, nyin ka jauh enggi Imba seduai Ngumbang,” ka apai tuai. “Ni asap aku deh?” ka iya. “Nya enggi nuan ka baru menyadi, nya meh gaya asap kita ka tau serang,” ko apai tuai.

Apai tuai lalu madah ka iya, laban iya meda bintang ayan ngenjing merera di langit, datai ka lima serak peturun iya ila agi didinga orang berita. Iya madah ka rumah ke ditiki iya nya Panggau Libau, menua luchak lunyau, kena biau jila isang orang ka berani. Udah nya Minggat pan lalu dani. Sereta dani iya dinga kijang ngenjing rauk-rauk bemunyi nunga ke luan bilik.

Jerita Penghulu Garran Lembang Batu

Udah mati Linggir “Mali Lebu”, menantu (enggau akan) iya Penghulu Garran “Lembang Batu” jadi Penghulu dalam taun 1875, megai sakayu Batang Paku. Apin lama iya udah nyadi tuai Iban Paku, dia bisi dua iko temuai datai ari Ulu Rajang. Seduai madah ka ngagai Iban Paku bala Iban di Sut dalam ai Baleh agi balat ngelaban perintah. Ninga nya Garran lalu mai Du enggau bala bukai enggau iya kayau anak nyerang bala Iban ke ngelaban perintah di Sut.Nyadi bala manok sabong ke bisi enggau iya leboh kayau tu nya Kandau apai Limbak, Kadam seduai menyadi iya Mambang, Lambor apai Nyanggau, Saan seduai menyadi iya Mula, Du, Malina apai Mundat, Enggu apai Genilau enggau Unggang “Kumpang Pali” ari Entanak.

Sida angkat ngena perau pengayau besai siti, mansa Sibu lalu nuju Nanga Ngemah. Datai sida ba kubau perintah di Nanga Ngemah sida lalu bemalam dia laban endang udah jauh lemai.

Tumu pagi siti, Garran enggau manok sabong iya lalu niki ngagai opis perintah dia. Sida minta diri betemu enggau orang ke diasoh perintah nyaga Kubau nya. Tuan ke nyaga kubau nya lalu nanya ka penatai sida. Garran lalu madah ka sida datai ari Paku deka ngalah ka munsoh dalam Sungai Sut ke agi ngelaban perintah Raja. Tuan ke dia lalu madah ka Raja bisi udah berunding ngasoh Linggir “Mali Lebu” nyerang menoa nya. Iya lalu nanya enti sida Garran ngelala Linggir. Kadam lalu nyaut (laban Garran enda tau nyebut nama mentua iya Linggir) madah ka Garran nya anak menyadi serta menantu Linggir empu. Ninga saut Kadam, Tuan ke nguasa kubau nya lalu nanya enti Garran bisi udah kala ngulu Ka orang ngayau sabedau tu. Kadam lalu nyaut madah ka Garran endang teleba ngulu ka orang ngayau. “Enti iya enda kala ngulu ka orang ngayau, tentu kami enggai nitih ka iya,” ko Kadam nyaut. Ninga nya, Tuan nya lalu ngasoh sida betemu enggau iya baru pagi siti.

Tumu pagi siti, Garran enggau bala iya lalu niki baru betemu enggau Tuan nitih ka janji sida. Leboh ka betemu kali kedua tu, Tuan ngemendar ka sida nyerang sabuah rumah panjai Iban dalam Sut aja. Tang iya enda ngasoh sida munoh bala indu enggau anembiak. “Enti kita bisi tetemu ka sida tu, kita tau nangkap sida lalu mai sida pulai ngagai menoa kita,” ko Tuan dia. Tuan nya lalu ngasoh sida angkat mudik kulu pagi siti.
Tumu pagi siti sida Garran lalu mudik kulu lalu masok Nanga Sut. Dia sida ngetu laban sida semina tau ngalah ka sabuah rumah munsoh aja ke semak Nanga Sut. Sida lalu berengkah ngaga palan ke endor sida bemalam serta ari endor bala manok sabong ngikup rumah munsoh.

Lemai nya sida lalu baum ngator bala ke ngemata ka munsoh. Garran lalu ngasoh Kandau besuar kulu ngena perau mit iya. Enda lama udah nya peda Kandau datai baru ngasoh sida sedia nyerang munsoh ke deka datai ari ulu ngena sabuah perau mansa sida dia. Ninga nya, Garran lalu ngasoh sida sedia negah munsoh ke datai nya ngena perau pengayau sida.

Leboh sida mudik deka nempoh munsoh, nyau ka semua munsoh ke enda ngadang muai diri ke dalam ai ngerari ka diri. Taja pia, bala sida Garran sempat munoh serta nangkap sakeda sida. Leboh ka begau dia, Lambor bedengah siko lalu nangkap siko, Kandau bedengah siko serta tangkap siko, Mambang nangkap siko, sida bukai semina bulih dengah siko aja semina Enggu, Kadam enggau Munjie.

Enda mukai-mukai, pulai sida ari Nanga Sut, sida lalu ditan ka perintah di Sibu laban ko perintah, Garran nadai minta pamendar ari sida ngayau. Samoa tangkap sida lalu diambi perintah dia. Datai sida di Paku, agi enda puas ati ka ditagang perintah di Sibu, iya lalu mai bala iya nurun kayau anak baru. Skali tu sida bedarat lalu nyuong tuai Iban dua iko di Kanowit ke benama Ubong seduai Lintong “Moahari” enggau nyerang bala Iban Ibau ke diau ari ili Kapit. Leboh kayau tu, bala Garran bisi bedengah serta bulih tangkap.

Udah ngalah ka Sut enggau Ibau, Garran skali agi mai bala kayau anak ngagai menoa Dayak Maloh dalam menoa pegai Belanda. Leboh sida undor sungai Kapuas, dia sida ditimbak bala soldadu Belanda ari perau. Kategal tu sida lalu nikal mulai ka diri udah sida bulih pala enda bengat maioh. Di rantu jalai, sida betemu enggau Bansa Maloh siko ke minta sida munoh Maloh siko ke benama Sangun. Iya tu mangah bendar enggau sida menoa nya lalu iya endang dipagedi ka bansa Maloh bukai ke diau dia. Iya mega diau kediri di langkau umai iya.

Nyadi tiang langkau Sangun tinggi bendar digaga iya, enda datai julok enggau sangkoh ari tanah. Leboh sida ngelingi langkau iya, Sangun mandang ka mata sangkoh iya ti besai serta panjai. Bala Garran enda tentu berani bediri semak langkau iya nya. Meda nya bakanya, Garran lalu ngasoh Mula nyadi ka api kena sida nepok Sangun keluar ari langkau iya. Meda sida menyadi ka api, Sangun lalu nyikap diri deka nurun ngelaban sida di baroh langkau iya. Datai iya di tanah, iya lalu disatup sida Mula, Juing, Gerijih, Muking, Jugol, Banggai enggau sakeda sida bukai ke enggau dia. Laban Sangun tu endang orang kering serta besai, pedis bendar bala sida Garran deka ngalah ka iya.

Nyau kelama udah nya baru Sangun rari niki bukit atas langkau iya. Garran lalu nitih ka iya enggai ka iya kelalu jauh rari masok babas.

Meda Garran nitih ka iya, Sangun lalu ngetu rari laban iya deka nyatup Garran. Leboh ka bepantap dia, Garran lalu ulih mantap Sagun ba atas pah iya ke ngasoh iya rebah dia enda ulih bejalai agi. Iya semina ulih nyilat ngena terabai iya aja. Garran lalu ngasoh Mula nembu ka Sangun dia. Pala Sangun lalu bai sida pulai ka Paku.

Udah bekau tu, Iban Paku nadai agi ngayau bansa orang bukai kelimpah ari ke nyadi bala Raja ngalus ka menoa.

Penghulu Garran “Lembang Batu” parai di Paku dalam bulan Tujoh, 1900.

JERITA UNGGANG ANTU GERASI

UNGGANG KE bejulok Antu Gerasi nya endang pugu orang berani dalam menoa Batang Ai apin Bantin “Ijau Lelayang” seduai Ngumbang “Brauh Langit” tediri nama. Unggang tu endang tuai matak serang, lalu serang iya nadai kala balang. Samoa menoa ke udah kena serang iya, kenu ku cherita, nadai kala enda papa sereta enggau nadai kala enda muai ai mata. Iya endang enda kala nitih ka serang orang, endang mun ka diri empu. Leboh maia cherita tu nyadi kalia, Unggang berumah muak ari ulu Nanga Engkari mimit.

Nyadi sakali ba rumah nya Unggang matak bala iya niri ka Gawai Kenyalang. Samoa orang ke samakai enggau sida endang diambi magang, baka ari Engkari enggau ari Emperan. Hari nuntong endor maia begawai, orang maioh pen sama begulu dia. Nya alai rami meh sida maia nya. Pagi siti, bala belator deka niri ka sandong. Sandong udah tediri, mensia maioh mulai ka diri ngagai rumah diri empu.

Tujoh hari udah lepas gawai, peda sandong Gerasi tak rebah. Rebah sandong nya tadi lalu ngelantar ka Batang Ai, lalu nadai temu tunga agi. Selam ka ulu nadai temu, selam ka ili nadai mega temu.

Malam nya Unggang empu bisi mimpi. Dalam mimpi iya asai ke betemu enggau sandong iya nya tadi ke mali diri nyadi raja nabau. Nabau nya lalu nyumpah Unggang tau serang numbang ka menoa, sereta lalu madah ka turun-menurun iya deka kaya raja . Nabau nya mega madah ka Unggang samoa menoa ke kena sprang iya nadai enda nundok.

Apin lama udah bekau gawai nya Unggang bebunoh ngelaban Ubong seduai Along ba Tuchong Kelikit di Ulu Lemanak, kategal seduai nya mantu orang ari Skrang. Ubong seduai Along alah, lalu dipinta Unggang mayar sigi tajau rusa ka tanda seduai ngaku alah. Tajau nya agi meruan datai ka sahari tu.

Lepas tu Unggang bejulok Antu Gerasi enggau sida sarumah pindah ka Nanga Delok. Apin lama udah bala sida Unggang ngentap ka pendiau diri di Nanga Delok alai datai bala Pengiran Suma. Pengiran Suma nya tuai bansa Laut ari Nanga Tawang di Batang Kapuas. Bala Pengiran Suma nya datai deka ngalah ka Apai Bulit di Nanga Lalong, enda jauh ari ili Nanga Delok. Lalu dikena nyemerai Batang Ai, bala Pengiran Suma ngaga andau ngena wi semambu. Tang maia tu bala sida Apai Bulit sarumah udah nyau bedampa ba Langgong Kemantan di ulu Sasawa. Nya alai datai bala Pengiran Suma ba rumah lama sida Apai Bulit sida nemu rumah tak puang, semina tinggal indu enam iko aja ke nutok di tembawai nya. Indu enam iko ke nutok nya lalu dibunoh sida magang.

Pedis ati ninga pengawa Pengiran Suma ke deka ngalah ka Apai Bulit, Unggang mai anak iya Layang ke bejulok Biau Balai sereta enggau bala sida sarumah ngipa bala Pengiran Suma.

Malam nya bala Unggang lalu ngeram ka ipa. Sida lalu besatup enggau bala Pengiran Suma. Leboh ke bamok nya bala Pengiran Suma mati enam iko, tang bala Unggang endang nadai ruji mimit. Meda utai bengat bakanya, Pengiran Suma empu nguji deka ngerari ka diri tang nemu andau semambu sida ke meraka Batang Ai udah diketas orang. Enda berani ngelaban agi, Pengiran Suma lalu niri ka tambai burak madah ka diri alah. Pengiran Suma enda dibunoh sida Unggang tang diasoh iya pulai ka menoa iya empu.

Tang udah bekau tu, anak Gerasi ke benama Layang apin puas ati bebunoh. Nya alai iya lalu ngupah orang dua iko ngena tajau betanda awak ka seduai nya deka dibai iya ka Tawang, laban Layang deka mai Pengiran Suma bebunoh baru. Datai di Nanga Tawang, Layang ke bejulok Biau Balai enda kakang endang tak lalu mai Pengiran Suma bebunoh. Ninga nya, bala Pengiran Suma terus madah ka diri enggai bebunoh ngelaban Unggang agi. Pengiran Suma empu minta ampun ka pengawa iya ke udah, sereta lalu meri Layang sigi tajau rusa enggau sasingkap pinggai bulan ka tanda badu bebunoh. Tajau nya agi dikembuan bala peturun Gerasi ke endang empu pun bilik di Ensawang, Lubok Antu, datai ka diatu.

Laban enggai ka dikumbai Gerasi bula ka semaia, Pengiran Suma empu agi nganjong sigi tajau betanda ngagai Penghulu Alam, uchu Unggang “Gerasi”, ka tanda bekaban. Laban empa sumpah antu sandong nya tadi, samoa menoa ke kena serang Gerasi enggau anak iya nadai enda nundok magang. Pengiran Suma ke nundok nya semina mandang ka sekeda ari empa mimpi Unggang.

Tanah rumah sida Unggang ke endor sandong nyadi nabau nya lalu dikumbai ‘Tembawai Sandong’, nyadi ka pesaka samoa peturun Unggang ‘Antu Gerasi’ datai ka kemaia tu.

Penatai Kitai Bansa Iban

Nangka ke diatu, nadai udah ditemu bisi bup tauka dokumen ti nyemetak nerangka asal penatai bansa Iban. Pansik ke silik lalu nyengala pasal bansa Iban pan nadai udah kala dipejalaika. Orang ke tuai-tuai semina nemu bansa Iban datai ari Batang Kapuas, Kalimantan, di Indonesia.

Enti nitihka pansik orang ke landik pasal mensia, bansa Iban dipelabaka datai ari menua Yunnan, di menua China. Ari Yunnan, Iban pindah ke Indochina. Ari Indochina, Iban pindah ke Semenanjung Tanah Melayu (Malaya). Ari Malaya, Iban pindah ke Sumatra. Penatai sebengkah pengarap ari menua Arab di Sumatra ngujungka Iban pindah ke Borneo laban ti ngenggaika ajar pengarap ti mentin makai dagin babi.

Bisi mega siti agi pansik madahka bansa Iban tu datai ari Gunung Mensuat, semak Mecca di Saudi Arabia. Ari Gunung Mensuat, Iban pindah ke Sumatra. Ari Sumatra, Iban pindah ke Borneo iya nya nepat Batang Kapuas sebedau melunggang ke Sarawak kitu.

Taja pia, bisi seraban bansa Iban ke ukai datai ari Batang Kapuas. Raban sida tu dibatak Sebatin ke bemain ai pasang enggau anak iya Derom datai ari segum gigi gumbang. Iya mega bisi siku agi anak lelaki ke benama Senaun. Sebatin tu datai ari Timur Tengah, tepawah dipangka ke gelumbang sereta terengkah di Tanjung Datu ba ujung Pulau Borneo.

Anak iya Derom beranakka Sera Bungkuk Ketuk Tunjuk Penebuk Tiang Tembang ti nurunka Iban Ulu Batang Ai, Beketan enggau Iban Saribas. Anak Sebatin ke benama Senaun tu nurunka Tugau, iya nya siku tuai bansa Rajang tauka bansa Tanjong ke chukup beberita dulu kelia. Tugau tu kering sereta berani. Empa pengering Tugau, ai kemi iya aja tepesukka daun birah (keladi).

Siti agi jerita madahka bansa Iban tu datai ari Kamuja (munyi Cambodia). Iban pindah ari Kamuja meraka tasik ke Bintulu, Sarawak laban enda tan begulai enggau sebengkah raban bansa ti ganas di Kamuja ke dikumbai bansa Kamarau (munyi Khmer Rouge) ke suah kena pansa leka main asal bansa Iban.

Dulu kelia di Batang Ketungau, pati Kapuas bisi dih siti menua tauka siti genturung pendiau ke dikumbai Tembawai Bejuah. Kedua bali nama iya Kemedu Repuk Lampung, Ketimbang Lentur Ujung, Temaga Gelang, Terusan Tanjung Bakung tauka Nanga Nuyan. Ba menua tu menya kitai Iban agi begulai sejalai enggau Petara, antu, jelu enggau semua leman utai enseput dalam dunya tu. Sida iya bisi tiga buah rumah panjai ti betuaika Sengalang Burung, Gemuring Gading (apai Keling) enggau Bujang Sebalu Ngenang kedua bali nama Batu Anggung Ke Beruntung Mali Balang (apai Tutung). Endur Tembawai Bejuah tu kelia kenu ku jerita tuai bansa Iban nya ba urung bila tiga Batang Ketungau, pati Batang Kapuas iya nya semak Lemu enggau Lepung Lidong dalam sitak Kabupaten Sintang, Kapuas Tengah, Kalimantan Barat, Indonesia ke diatu.

Bansa kitai ke ngumbai diri Iban bisi dua kali ampit enggau beserara besai. Keterubah iya lebuh beserara enggau sida Sengalang Burung, Sempulang Gana, Ribai, Apai Sabit Bekait, Ngelai enggau semua leman utai enseput di dunya tu ke nyadi ba menua Tembawai Bejuah. Sida nya kelia ke beserara enggau pangan diri ari Tembawai Bejuah nadai tentu temu kebuah ke nyemetak tauka bebatang lalu pengingat orang ke tuai ari ai siti enggau ai siti nadai tentu sebaka lalu mayuh besibil.

Sekeda tuai ari Batang Engkari enggau Kalaka, Saribas madahka kitai Iban kelia beserara bepun ari sida ti berebutka pintu mas enggau Buah Nimung tauka Buah Pauh Bali tauka Buah Pauh Laba ti tumbuh ba belakang Antu Gumba laban Buah Pauh Laba nya tau ke pengaruh kena matak serang.

Pengingat sekeda tuai ari Batang Undup madahka penyerara nya kelia ketegal Bungai Nuing ti udu mejal Sengalang Burung berayah maya ngintu Gawai Burung, iya nya lebuh sida ke pugu-pugu berani berayah ngelingi pun sabang di tanju. Lebuh iya berayah, dia kaki Sengalang Burung lama agi tinggi agi begantung ari tikai peda sida ti lalu ngujungka iya terus ke langit. Ari nya, Sengalang Burung mih tuai keterubah angkat ninggalka Tembawai Bejuah nya kelia.

Sekeda tuai ari Batang Skrang madahka sida ti beserara nya ketegal ari Antu Tapang ti enchuri semakau ari Sintau. Dikena malas penyai Antu Tapang, Sintau lalu mukung Antu Tapang enggau tai sereta manching iya kemi. Nya mih kebuah jugi (isi tumbung) idang manyi masam nyentuk ke sehari tu.

Bisi mega orang ke tuai madahka penyerara di Tembawai Bejuah nya kelia ketegal ari Keling ke belaya enggau Apai Sambang Rumbang Kesuling, berebutka taring tengiling tau ke aning simpai lengan. Laban Aki Nyakai Lang Benguk (Sengalang Burung) udah belaya enggau Apai Selulut Ribut Ngusuk, berebutka batu tanduk pelanduk tau ke penunduk madamka seruan. Laban Laja seduai Pungga udah belaya ngelaban Apai Bua Buga, berebutka batu punggung kesa mesai ma tekaran Kayan. Laban Ngelai seduai Tutung udah belaya ngelaban Apai Sambang Rumbang Ketebung, berebutka batu tanduk adung raja ikan. Ditetak kitai ngena jaku pandak, sida tu beserara kelia ketegal ari berebutka pengaruh tauka berebutka kuasa laban sama enggai alah ari pangan diri.

Penyerara ke dudi agi kenu ku jerita tuai ari Batang Lemanak madahka kitai Iban beserara enggau orang Panggau Libau bepun ari Apai Keling ke benama Chang Chelawang enda ulih peda agi udah iya ke makai sili tauka silui ural tedung. Penyerara tu nyadi di Nanga Semitau, pemindah sida ari Lawai Labai. Lawai Labai tu tembawai lama Iban enggau Orang Panggau udah ke beserara besai ari Tembawai Bejuah (Tembawai Tampu Juah).

Maya ke beserara ari Tembawai Bejuah kelia;

Sengalang Burung pindah ke Tansang Kenyalang. Ari Tansang Kenyalang, Iya pindah baru ke Tuchung Besanjung Besinjang, Tatai Redai Isang (kebung langit) nabanka gerempung balang begeman.

Pulang Gana pindah ke Rantau Rarau Temiang, Munggu Gulu Sengkenyang, Nanga Temaga Gelang nabanka leka sesangga tanam.

Ngelai seduai Tutung pindah ke Gelung Batu Nakung nabanka siung raban peputan.

Ribai pindah ke tasik besai nabanka pengembai ubat jedian.

Apai Sabit Bekait pindah ke langit mit nabanka rarit baku bekatan.

Raja Tanduk pindah ngagai Teluk Ai Nyuruk Keruk Semalam nabanka gulung buk tau ke penunduk madamka seruan.

Anda Mara pindah ke tasik reremba nabanka menaga tajau pelawan.

Ini Manang Menchi (Ini Andan) pindah ke langit siti nabanka batu enda kudi, pengelasi ai pemalit tegalan.

Ini Manang Chelung pindah ke tisi langit gadung, nabanka lupung kulit enteli buban.

Gemuring Gading pindah ke Tinting Rinding Pendawan nabanka taring uting lunchik juring tau ke penyelinting pengerurus tikam.

Ba penyerara keterubah tu, kitai Iban agi begulai enggau orang Panggau. Bisi jerita madahka kitai Iban enggau orang Panggau agi diau di Tembawai Bejuah sepengudah beserara besai. Ari Tembawai Bejuah tu mih Iban enggau orang Panggau pambar ari pangan diri laban enda tan begulai enggau Bungai Nuing. Pun jerita iya keterubah tu baka tu:

Nyau pengelama ke diau di Tembawai Bejuah, Gemuring Gading parai tuai laban selalu dipekung penyakit pedis perut. Dikena bebasaka pemati iya, ulit diletak sida pengelama tiga taun. Maya ke ngulit betambit enggau langit, bekenang melintang bukit nya, semua utai idup enda diasuh ragak. Enti manuk engkukuk, manuk sayat. Enti babi meruik, babi bunuh. Anak mit enda diasuh inggar lalu utai idup ke bukai enti bisi didinga richah terus bunuh tekala nya.

Ensera Kelia Jelu Enggau Mensia

Pejalai apai orang ke keran bendar ngiga ulu lungga entelah anak iya

Lebuh bala jelu terubah nemu diri balat tusah tegal anak mensia ke mula betebangka kayu, besungkurka bukit, bepunaska kampung jerung, sida lalu begelumu sereta b’asuh-asuh munuh sereta nagang Anak Mensia terus ngereja pengawa nya. Tang nyau keleju, sida lalu enda tetemuka bakani ku jalai munuh sereta nagang Anak Mensia.

Bup Danau Alai ke disalin ari bup jaku Inglis tulis Mervyn Skipper ulih niang aya (Tan Sri Datuk) Gerunsi Lembat seduai Pancras Eddy nya nyerita enggau penuh pasal aum bala jelu enggau semua utai idup dalam babas ke deka nagang anak mensia berimba menua, betebang kayu, begagaka jalai, rumah enggau mayuh utai bukai.

Laban ke lalu enda nemu ni chara ti patut sereta ngasi kena nagang Anak Mensia, nya alai semua bala jelu ke bisi penemu d’asuh mansutka magang. Tang mayuh ari sida nya mantaika penemu sida enggau jalai nusui cherita enggau ensera ke udah nyadi ngichaka nya ulih mai penemu baru ngagai bala ke enggau baum dia.

Nyadi siku ari bala ke nusui ensera nya Sawa. Ku Sawa, nyadi dulu kelia, bisi dua iku melaki bini. Laki iya nya penama Pa Kelau.

Seduai tu punas, sereta selalu minta anak lelaki ngagai Petara. Besari-sari meh seduai besampi Petara meri anak lelaki.

Nyadi hari siti seduai turun k’umai. Datai ba umai,seduai enda gawa laban tembu berundingka penyamai enti bisi anak lelaki, lalu bisi nyangkung seduai iya gawa, laban ke sama udah tuai lalu enda tentu kungang agi.

Benung seduai ke bejaku-jaku dia, seduai bisi meda Menaul manggum Tikus ngelayang ari atas seduai. Tikus nya tadi lalu dilengkaka Menaul nya tadi lalu labuh semak kaki Pa Kelau, lalu d’ambi iya.

“Peda nuan deh wai,” ku Pak Kelau nganu bini iya, “pemanah anak Tikus tu, iya ga lelaki. Anak tua lah tu diberi Petara ari langit nyin,” ku iya.

Lalu dibai seduai meh anak Tikus nya tadi pulai kerumah, lalu datai di rumah, lalu diberi seduai iya baju mirah sereta lalu d’intu seduai baka ngintu anak diri empu.

Tudah anak Tikus nya tadi ngasi bendar ka seduai, nemu nulung seduai iya gawa d’umai, pulai lemai nemu bendar ga nulung Pak Kelau ngema padi. Maka utai enda berani ngambi kediri enti nadai ari asuh seduai melaki bini nya.

Nyau kelama-lama anak Tikus nya tadi pen mansang besai ga, nyau bujang bendar. Gamal tudah ga chukup penyigat, mina bisi penyelaie mimit laban mulut tudah tuai ti munching.

Meda anak diri nyau bujang, Pak Kelau seduai bini iya pen nyau berunding deka ngiga ka iya bini ngambika beranak betelesak lalu bisi ngidupka seduai ke nyau udah tuai lebuh nya.

“Nya alai tu Igat,” ku Pak Kelau nanya anak iya, “baka nuan nyau bujang raya, numbas bendar umur alai ngatur diri. Nya ala kami duai indai nuan nyau betati deka ngiga ka nuan bini,” ku apai iya.

“Tak pemilih nuan indu kitai ditu,”pia ku Pak Kelau.

“Aku apai,” ku Tikus nya tadi, “ukai enggai bebini, tang enggai bebini ka indu kitai di menua tu. Laban indu kitai di menua tu beli magang lalu tegar bendar ngerising. Enti aku bebini, aku enggai enda jadi enggau utai ke pemadu bekuasa dalam dunya tu,” pia ku saut iya enggau apai iya.

Ninga nya lalu tusah ati meh Pa Kelau. Iya lalu madah tekala nya ngagai bini iya.

“Aku udah bejaku enggau anak tua,” ku Pak Kelau madah ngagai bini iya, ” tang iya tak mutus bendar ati enggai bebini indu kitai menua ditu, laban ku iya indu kitai menua ditu kelalu tegar ngerising, nyau selalu rangkai ngeli. Nya alai enti sema iya bebini iya enda tau enda jadi enggau utai ti pemadu bekuasa di dunya tu. Nama utai ti pemadu bekuasa dalam dunya tu deh, bisi kala ninga orang nyebut tauka ngenang nuan?” pia ku Pak Kelau nanya tudah bini iya.

Tak ngenjing nya nyaut bini Pak Kelau, mina demuh aja. Semalam sehari iay nadai bemunyi, berunding ka jaku anak seduai nya tadi, lalu bisi mega berasai tegepang mimit ninga anak seduai ke madah bala indu sida menua nya kelalu tegar ngerising. Udah nya baru iya bulig runding madah ngagai Pak Kelau.

“Dalam penemu aku, retuai,” ku iya, “nadai utai ke lebih agi bekuasa ari Matahari,” ku iya bejaku enggau laki iya.

“Enti munyi nya, nurun meh aku tu ngiga Matahari,” pia ku Pak Kelau, “tang bela makai dulu aku tu, nyau engkerau buah lemba tu,” ku iya nganu bini iya.

Badu makai, Pak Kelau lalu nurun ngiga tunga Matahari padam. Bejalai meh tudah tuai, niki bukit, melunggang tinting, ngilika ai, nguluka sungai, tanjung dipuntang ngenyadika diri lengkas agi tetemuka Matahari.

Nyau kelama-lama baru iya manggai ba munggu semak alai Matahari padam. Dia tudah tuai lalu changuk-changuk duduk nganti Matahari ke mansa. Lebuh iya meda Matahari nyau semak, sereta disadang iya ninga kangau, iya lalu nyapa.

“O Matahari!” ku iya, “anak aku diatu nyau bujang raya, chukup umur alai ngatur diri, tang iya enggai jadi enggau indu kami semenua laban indu kami din bagas ngerising ku iya. Nya alai anak aku deka jadi enggau utai ke pemadu bekuasa ba dunya tu. Kati ku nya deh Matahari, ukai nuan ke pemadu bekuasa ba dunya tu?” ku Pak Kelau, nyau enggau seput laban empa pengangat kena panchar Matahari ke kelalu semak.

“Ukai !” ku Matahari, “ukai aku ke pemadu bekuasa dalam dunya tu. Remang deh besai agi kuasa ari aku laban sida suah ngelindung aku, nya alai manah nuan kin ngiga Remang,” ku Matahari ngajar Pak Kelau.

Angkat ga Pak Kelau ari nya. Bukit diturun, bukit ditiki, nguluka sungai, ngilika ai, lalu niki munggu laban atas munggu nya bisi Remang.

“O Remang,” ku iya, ngangau Remang begada-gadai enggai ka Remang tegepang tekenyit lalu pambar. “Anak aku diatu nyau bujang bendar lalu chukup umur alai ngatur diri bebini, awak ka bisi bini mela makai, tang iya enggau jadi enggau indu kami menua din laban ku iya bala indu kami menua tegar bendar ngerising. Iya keras minta giga ka aku utai ke pemadu bekuasa di dunya tu. Kati ku deh Remang, ukai nuan utai ti pemadu bekuasa di dunya tu?” ku tudah Pak Kelau nyapa Remang.

“Ribut besai agi kuasa ari aku,” ku Remang, “laban kia iya ngasuh aku bejalai, kia ga tunga aku mindah,” ku Remang nyaut Pak Kelau.

Angkat ga Pak Kelau ari nya ngiga tunga Ribut. Nyau kelama iya ke bejalai, baru iya niki ngagai tuchung bukit sigi ke tinggi bendar, dia iya betemu enggau Ribut ke baru belabuh muput ka Remang.

“Amat meh Ribut tu bekuasa,” ku ati Pak Kelau din, meda Remang ngenjing pambar-pambar kena puput enggau sepu Ribut. Enda liat agi ati iya ngemataka dia, lalu dikangau ka iya Ribut.

“O Ribut!” ku iya, “anak aku diatu udah bujang bendar, kami duai indai iya deka ngatur iya bebini ngambika bisi enggau iya begulai. Tang iya enggai jadi enggau indu kami menua laban sida bagas ngerising. Iya keras deka jadi enggau utai ti pemadu bekuasa dalam dunya tu. Ukai nuan tu orang ke pemadu bekuasa ba dunya tu kini?” ku iya.

Ninga nya, lalu ngetu Ribut muputka Remang lalu nilik ngagai tunga Pak Kelau.

“Ukai aku ke pemadu bekuasa di dunya tu, aya,” ku Ribut nganu Pak Kelau, “Bukit lebih agi kuasa ari aku, laban puas bendar aku bepuput ngelaungka iya,” ku Ribut. Ninga munyi nya, lalu mutar ngagai Bukit ga tudah Pak Kelau.

“Enti munyi nya, nuah meh Bukit jadi enggau anak aku,” ku iya. Lama Bukit demeram ninga jaku nya. Ukai enggai jadi enggau anak nuan ga aku aya,” ku Bukit, “tang kuasa aku enda berapa besai, laban bisi utai ke mit bendar berumah dalam tubuh aku, nya baru utai ke pemadu besai kuasa dalam dunya tu.

“Utai nya selalu nebuk aku, diatu nyau deka kebus tubuh aku tu ditebuk iya,” pia ku Bukit nganu Pak Kelau. “Seharitu balat pemedis kaki aku tu udah ditebuk sereta dikerituk iya, dini enda para aku tu ila deh,” ku Bukit serabana ka pemedis diri.

Udah Pak Kelau mending cherita Bukit nya, lalu nurun meh tudah tuai ngagai kaki Bukit, lalu ngiga utai ke pemadu bekuasa di dunya tu. Datai itya ba kaki Bukit, lalu tilik iya kia, jenguk kia-kia, nadai ga meda utai nyelai.

Nyau kelama baru iya tepedaka utai kerus-kerus ngeraus tanah ngaga lubang. Tilik iya semak agi, peda iya Tikus.

“O,” ku ati Pak Kelau din “tu deh utai ke pemadu bekuasa ku Bukit tadi.”

Tak lalu ditangkap iya Tikus nya tadi, lalu terus bai iya pulai kerumah sida. Datai din lalu disua iya ngagai anak bujang iya.

Sereta meda anak dara Tikus nya anak bujang iya lalu manjung naka penginggar-nginggar empa pengaga ati, laban apai iya Pak Kelau udah ngenataika peminta iya.

“Tu baru indu ka bini aku,” ku iya, “lama bendar aku udah nganti lalu irau ati takut ka nuan enda bulih,” ku iya nganu apai iya.

Lepas nya lalu begulai meh seduai nya tadi, sereta lalu ngaga sarang seduai empu ba kaki Bukit.

Nya alai tak kini-kati pan Tikus deka mali nyadi mensia, enda meh ulih, laban dia tadi kitai udah ninga, ku Sawa sereta lalu nguap.

Nyawa iya ke ensera nya tadi nyau tendu setendu, lalu bisi engkuam mimit ba ujung ensera laban iya empu ngantuk, ukai bala orang ke ninga ngantuk.

Ba pengujung ensera pala Sawa pan nyau luga-luga balat agi ngantuk. Ensera iya abis, tudah tuai pan tinduk ga.

Kebuah ke balat ngantuk nya, laban iya ke agi kenyang sereta berat udah bekau nelan uduk Anak Mensia ke bisi ngeluga iya nyalak sebedau iya d’asuh sida nusui ensera tadi.

Ensera Enda Tau Buya Tauka Ngelanggar Penti Pemali

Senti bini Agut ke empu semengat dikarung buntak rusa parai tegal anak iya bisi buya munuh buntak

Kira bisi tiga bulan udah ke beniat ba bukit tinggi, Senti bini Agut pan nyau betubuh bisi. Kasih meh Petara ka seduai melaki bini.

Lebuh kandung Senti nyau manggai ngagai sembilan bulan iya pan beranakka dua iku indu besapit. Iya ke beranak nya nadai penusah-nusah. Nadai utai pengaga-ngaga nya seduai melaki bini meda anak indu seduai sama manah gamal.

Angkat deh Agut tu enda mukai-mukai tak ngenyit sakit, lalu parai. Bangkai iya diintu sida tiga menyanak dua malam lalu udah nya diengkah ba lubang batang kayu, enda ditumbak. Kebuah enda ditumbak nya laban nadai sentubung endur engkah iya.

Nya alai sida tiga menyanak tu nyau tinggal kediri, nadai orang bukai enggau begulai, lalu nadai nemu tunga menua tauka mensia bukai.

Lebuh maya apai seduai nya parai, seduai menyadi endang sama udah angkat dara,lalu udah sama tau nulung indai seduai bumai.

Sapit ke tuai agi nya penama Liang lalu adi iya penama Angan. Liang seduai angan sama bajik sereta manah ulah, laban ke endang diajar apai indai seduai enggau naka ulih kenyau ari mit.

Agut ke parai nya ninggalka umai mekang-mekang taun. Nasit endar ga baru tembu nugal.

Udah bisi bebulan iya ke nadai, sida tiga menyanak pan belabuh mantun.

Nyadi Angan tu nyelaie endar utai diketenguk, iya nya tetenguk ka makai buntak. Ngumba endar ga mayuh amat buntak maya mantun. Lebuh ke mantun nya Angan tu nyau enda tentu masuk mantun laban semampai limpang begiga sereta betangkapka buntak.

Dulu ari tu, indai seduai Senti endang udah bisi meri jaku ajar ngagai seduai. Ku iya: “Enti seduai ngiga buntak, seduai tau nangkap sereta mai semua bansa buntak, semina seduai anang sekali-kali mai tauka munuk buntak rusa, laban buntak rusa nya karung semengat aku. Anang enda ingat seduai, kitai tu mega mali makai tauka munuh buntak rusa.”

“Au meh indai, enti enda tau dibai enda meh kami duai mai, enda meh kami duai munuh, ukai baka ke enda ngelala buntak rusa kami duai tu,” pia ku saut Liang. Angan pan nganggut pala iya ngayanka diri mereti sereta setuju.

“Kati berapa iku buntak rusa ke ngemai semengat nuan deh indai?” ku Angan nanya.

“Ee, tak semua buntak rusa nya mali dibunuh kitai. Orang bukai nadai pemali munuh, nadai pemali makai, tang kitai mali munuh, mali makai,” ku Senti nerang ngagai anak iya.

“Nemu meh kami duai indai,” ku Liang nyaut.

“Nya meh anak, enggai ka seduai kelanjur pagila lusa dudi hari ila,” ku Senti.

Enda bangat lama udah nya, angkat deh Angan tu tak ngenyit sakit kena tabin chelap angat. Nama lebuh iya chelap ngenjing getar-getar tubuh enggau kaki jari, tang nama iya angat enda ulih dikipas. Nama enda ditiup, iya ngigau lalu luput ngerang.

Dia meh nyawa iya pan enggai makai, iya pan nyau majak kurus sekurus. Ngirup pan nadai masuk utai mesai bulu mata. Mua pan puchat, lalu enda tentu bajik baka selama.

Iya tak mina gali aja, lalu kelalu lembut tulang enda ulih angkat ari peninduk. Macham-macham sera digiga tang anang ka nyawa bisi masuk sera, ensium bau utai dempa pan enggai. Makin lama, makin kurus.

Indai iya seduai Liang irau sereta tusah bendar ati meda Angan ke majak kurus sereta enggai makai lalu enda gerai-gerai.

Pagi siti Angan madah diri tetenguk ka buntak. Ninga munyi nya Liang seduai indai iya bebendar amat begigaka buntak kelauk tudah Angan ngichaka iya pulai gerai. Mina nyeliah diri ari buntak rusa, tang semua bansa buntak bukai ke tau dempa endang tangkap seduai magang.

Liang mujur bulih tujuh iku buntai ruai. Buntak nya tadi lalu dilulun iya ambika lauk Angan. Udah mansau nya baru iya meri adi iya makai. Laban ke belauk ka buntak, dia meh nyawa tudah tuai bisi masuk sera dua tiga suap.

Hari siti nurun ga Liang tu begiga ka buntak ka lauk adi iya. Sehari nya iya bulih semilan iku buntak alau. Laban ke belauk ka buntak alau nya tadi, Angan bisi masuk makai lima suap asi. Iya pan belinsur bisi kering agi, lalu nyawa pan nemu tetenguk deka makai. Meda bakanya, ati indai iya seduai Liang pan lantang meda Angan ti bisi berupai mansang gerai.

Nyadi hari siti laban sida ke agi besai mantun, indai seduai lalu nurun ga mantun. Liang tinggal di langkau ngibun adi iya ke apin tentu kungang, laban agi bedau tentu gerai sakit. Pemedis adi iya ke tabin nyau bisi kurang, lalu pen tau ga nuduk ka diri. Indai seduai pen baka selama nurun berari mantun, lalu tiap maya iya pulai genap tengah hari iya endang selalu mai buntak, laban utai bukai endang tak nadai masuk kena Angan ngelalu ka asi.

Angkat deh hari siti indai iya nadai mai buntak agi laban iya nadai tetemu ka buntak pagi nya. Tengah hari nya Angan lalu enda makai asi laban nadai lauk aruh ba ati iya.

Tegal nya, iya pan lalu ringat dalam ati din, tang iya enda memunyi. Udah nya baru iya bejaku. “Kati alai indai nadai mai buntak k’aku?” ku iya.

“Iya ga nadai nemu buntak, nyau abis buntak bukai ku iya, semuti buntak rusa aja ke bisi temu iya di umai din. Tang nuan nemu, kitai endang mali makai buntak nya,” pia ku saut aka iya Liang.

Nyadi maya nya, indai seduai endang udah nurun mantun.

Angan tu endang selalu madah ngagai aka iya, nama nadai buntak ke lauk, nyawa iya endang enda masuk makai asi. Iya endang selalu ngasuh aka iya nurun ngiga buntak.

“Enti nadai nemu buntak bukai, buntak rusa nya mih bai nuan lagi,” pia ku Angan madah ngagai aka iya.

Nya alai ninga munyi nya, lalu nurun meh tudah Liang tu tadi, lalu bejalai enda jauh ari langkau sida tiga menyanak, nadai ga nemu buntak bukai, semuti buntak rusa aja ke bisi dipeda. Nyau kepuas ke nadai tetemu ka buntak bukai, iya lalu mai buntak rusa siku. Mayuh ga buntak rusa dipeda iya tang siku nya manah endar peda iya agi, gamal ga gemu sereta sentar agi ari sida bukai. Tubuh iya gadung, mata chelum, janggut iya kuning-kuning gamal.

“Nadai ku enggau iya meh, ga nadai buntak bukai. Buntak rusa tu meh bai aku, taja ka ayam iya pan pama meh lagi,” pia ku iya bejaku dalam ati diri. Iya pan lalu mulai ka diri ke rumah. Datai di rumah, buntak rusa nya lalu disua iya ngagai adi iya.

“Aku nadai bulih buntak bukai, semina buntak rusa siku tu aja ulih aku. Tang nuan anang makai iya, semina kayam aja tau,” ku Liang bejaku enggau adi iya. Buntak nya lalu disambut adi iya enggau jari sereta lalu dipegai iya. Ati iya ringat laban perut berasai balat engkerau lapar lalu tulang pan lembut.

Udah nya tadi, Liang pan lalu nurun ga nyauk ai ambi kena iya nyendia diri berapi tengah hari. Tinggal Liang ke nurun nyauk, dia Angan, laban ke ringat, tak lalu pichit iya buntak nya tadi, lalu dikusuk iya. Bekau nya, bangkai buntak nya lalu dibuai iya kebaruh rumah lalu dipantuk manuk. Buntak nya pan udah ditelan manuk, Liang pan pulai ga nyauk.

“Adi, ni buntak nuan tadi enda lepas laban nuan?” ku iya nanya Angan.

“Eh, kapa aku nya. Kini ka enggau nya, dempa enda ga tau. Puas aku bayam iya tak lalu aku gelam ba pala iya, udah nya lalu mati,” ku Angan nyaut aka iya.

“Dini alai nuan engkah bangkai iya deh?” ku Liang.

“Iss, bangkai iya udah ku buai ke baruh rumah. Kada enda udah diempa manuk kini,” ku iya nyaut.

Ninga nya Liang lalu nilik kebaruh rumah. Perening iya ke kiba, perening iya ke kanan nadai ga meda buntak nya tadi. Dini iya bisi dipeda agi, iya ga udah diempa manuk.

“Nadai pendiau endar ga nuan munuh buntak nya, nya baru nuan dianu indai ila,” ku Liang.

“Nganu pan kapa enda nganu deh, ukai baka ke bisi guna, diempa enda ga tau,” ku Angan ngeransi.

Enda lama udah nya indai seduai pan datai ga pulai merarau. Udah indai seduai tembu mandi, sida pan lalu merarau. Apin lama udah nya, indai seduai pan lalu beradu deka mupuk nurun baru. Lebuh iya baru deka nurun dia deh pala iya tak lalu berasai ngelu, atau iya lalu engkual, indah-indah asai orang ke pedera.

“Oh nama main aku tu asai tu. Pala aku tu tak ngenyit ngelu,” ku Senti madah ngagai seduai anak iya. “Ti tak majak bakatu, ni enda mati aku tu.”

“Nama utai nganu nuan nya deh indai?” ku Liang.

“Enda nemu meh anak, tang aku tu tak lain asai. Kada enda seduai di rumah tu bisi salah pengawa? Nyangka seduai bisi ngereja utai enda asuh aku,” pia ku indai seduai.

“Ngg, tadi bisi aku bulih buntak rusa siku, tang buntak nya udah dikayam Angan,” ku Liang.

“Kati amat nuan bisi bayam nya?” ku indai seduai nanya Angan.

“Bisi aku bayam iya tadi indai,” ku iya. “Tang nyau kelama aku bayam, lalu aku gelam ba pala. Nama deh indai, lalu mati meh buntak nya. Bangkai iya lalu buai aku baruh rumah.”

Ninga munyi nya, lama bendar Senti enda bemunyi. Udah nya baru iya bejaku, lalu ku iya: “Aku endang udah madah ngagai seduai, kitai endang enda tau munuh buntak rusa. Nya alai laban buntak nya udah mati, mati meh ga aku. Buntak nya ga endang karung semengat aku.”

Seduai menyadi sama sedu enda bemunyi, sereta balat penusah dalam ati din. Bebendar amat seduai sama nyabak ninga jaku indai seduai.

Indai seduai lalu berengkah ngerendam beras taja pan pala tudah tuai nyau majak ngelu. Lebuh beras nya udah kembai, lalu ditutuk iya ka tepung. Nyadi tepung nya lalu digaga iya ka sagun enggau sungkui. Padi digirau iya nyadi letup.

Merinsa bendar meh iya ke ngaga semua nya, laban pala iya ngelu ka tambah perut ke makin engkual. Lalu digaga iya semua utai nya tadi, selemai-lemai nya. Semua utai nya tembu, hari pan nyau malam ga. Kira nyau tebuka tawas, iya lalu dani, lalu ngerak Liang. Iya tu ngerak Liang begadai-gadai laban enggai ka Angan ninga.

“Nama kebuah nuan ngerak aku deh indai? Kati agi pedis pala nuan?” ku Liang.

“Ngg anak,” ku iya, ” tak mansang ngelu meh pala aku tu. Nya alai aku tu mati. Laban aku deka nurun ke Sebayan, nya alai aku ngerak nuan, enggai k’aku kum seduai ninggalka seduai. Naka meh pengelembau aku tu mati. Tang kati ku enggau iya, ga karung semengat aku udah mati,” ku iya. Sereta abis jaku nya, Senti lalu nurun ninggalka langkau sida mansang ngagai Sebayan.

Tudah Liang lalu bediri ba pala tangga. Ari nya iya ngemata ka indai iya niti jalai mansang ke Sebayan. Udah nya ila tama baru ke dalam kibung lalu gali. Ati iya din asai ke disayat.

Lebuh hari udah tawas bendar baru Liang angkat lalu nanggar ka periuk. Sekumbang iya ke berapi nya tadi, dia iya endang seruran nyabak tang iya enggai inggar, semina ai mata iya ke ngenying jempuk mua. Sereta asi iya mansau, iya pan lalu mantai ka periuk nya.

Udah nya iya lalu deka ngadu ka seduai menyadi iya makai. Ati iya endang majak asai ke disayat, lalu balat tusah, tang iya ngelantangka gamal diri. Lebuh pemakai udah sedia, Liang lalu nyuaka asi ngagai adi iya. Nyadi pagi nya, Angan nyau udah dapat bendar angkat, nyau tau bejalai. Ati Liang enda ngadang adi iya udah ngenapat nya laban meda iya tiga hari dulu endang balat endar tabin.

Angan tu lalu tama ngagai bilik endur sida makai. Sereta datai dia, iya lalu malik ke kiba, malik ke kanan, tang nadai ga meda indai seduai. Bedau ga iya enda bemunyi, laban ku ati iya engka indai seduai apin pulai nyauk.

Udah nya baru iya malik ngagai aka iya. Tekenyit bendar iya meda siku nya tak ngenjing jempuk mua laban ai mata. Meda bakanya, Angan lalu nanya aka iya. “Aka nama utai disabakka nuan?”ku iya nanya aka iya Liang.

“Kati ku aku enda nyabak, indai tua ga udah parai,” ku Liang nyaut adi iya.

Ninga indai seduai udah parai Angan lalu enggau naka ulih ngasakka diri nyabak, lalu maringka diri sebelah bilik. Liang pan sama ngasakka diri nyabak mega. Bebendar amat meh seduai menyadi nyabak, naka pemalat datai ka seduai sama langkang ai mata. Nyau alah ai mata nadai agi.

Nyau lelak ke nyabak nya baru seduai ngetu. Lebuh ke ngetu nyabak, nya baru Angan nanya aka iya.

“O aka,” ku iya. “Ni indai? Enti iya mati, dini alai bangkai iya? Lalu nama kebuah alai iya tau mati?”

“Kati ku iya enda mati, iya ga karung semengat iya buntak rusa udah mati. Karung semengat iya meh buntak ke udah dibunuh nuan kemari. Laban karung iya nadai agi, nya alai semengat iya enda tau diau di dunya tu agi. Semengat iya enda tau enda pulai ke Sebayan.

“Pagi tadi tumu iya nurun nitih ka semengat iya empu ke udah nurun dulu ari iya ke Sebayan,” ku Liang madah ngagai adi iya Angan.

Nya baru Angan ingat ka penyalah pengawa diri ke udah munuh buntak rusa sehari dulu ari nya.

Nya alai ari ensera tu, kitai Iban kemaya haritu, endang agi ngemeranka pemali aki ini peturun diri, laban enti ngelaban penti pemali nya, kitai tau kena tinggang penusah.

Ngambika banding, bisi kami serumah mali nanam liya, endang kenyau ari kelia. Enti nanam liya, sida disumpah antu buta.

Angkat deh lebuh indai orang nya belaki baru udah ke lama balu tinggal laki iya parai, anak biak iya enggau laki ke parai nya tau tak buta tang ukai ada buta.

Diatu baru orang nemu, laki dudi iya suba lebuh baru datai ba bilik orang nya bisi ngema anak pengkuan dulu bini iya, maya iya nanam liya. Nya alai laban dima apai tiri iya nanam liya, tentu meh nya sama enggau nanam liya. Nya alai berengkah ari umur iya lapan ngagai sembilan taun iya lalu buta.

Siti mega utai tau dipelajar kitai ari ensera tu, kitai enda tau enda ninga ka ajar apai indai kitai, laban besai endar kebuah kita mesti ngasi ninga ajar apai indai sereta mega orang ke tuai.

Ensera Engkajemu Seduai Engkajuang

Nyadi sekali dulu kalia di menoa ti dikumbai Lubok Meram Lansar Kerangan Betumpu Man enggau Rantau Rutan, ti endang diwan Raja Ganali enggau Bunsu Ikan, bisi dua iko indu benong dara, benong beramban mansang. Nama seduai nya, siko benama Endu Engkejemu lalu nama siko Endu Engkejuang. Gamal seduai sama bajik, tang iya ke lebih agi bajik nya Endu Engkejemu. Lalu ba pasal penemu enggau pengelikun pendiau serta enggau pengelandik ngereja samoa macham pengawa pan enda mega telaban ka Endu Engkejemu. Nyadi Endu Engkejuang tu jauh lain agi perangai enggau gaya. Iya cherdit bendar bejako sereta ketik-ketik pendiau enggau tak gilik-gilik gamal, reti nya linggar-linggar agi ari Endu Engkejemu. Enti temuai bisi datai, dudi orang bukai, dulu iya datai nunga. Iya ke bendar Endu Engkejuang endang sigi jegit ari samoa sida ti sama sarambau. Ba pasal ngereja pengawa iya endang enggai alah laban orang. Ni pengawa endang diuji iya magang, tang gamal utai digaga iya nadai tentu menuku. Samina nama tembu. Ti numboh ka pengawa iya enggai dudi. Ko ati iya, awak ka tembu dulu ari enggi orang. Tang suah pengawa iya nya tadi lalu enda tembu.

Nyadi sekali leboh Endu Engkejemu seduai Endu Engkejuang benong mandi, dia Endu Engkejuang nanya Endu Engkejemu. “Nama utai kena ngasoh buok panjai awak ke sabaka enggau enggi nuan, wai?” ko Endu Engkejuang.

“Eh! Wai, nadai nya bisi utai macham-macham dikena aku deh wai sulu, semina diasoh aku sugu tulang tilan.” Pia ko Endu Engkejemu nyaut.

Ninga munyi nya Endu Engkejuang lalu enda chachamang lalu ngambi tulang ikan, lalu diasoh iya nyugu buok iya. “Sugu buok aku tulang tilan, sugu abis, sugu lengis.” Ko Endu Engkejuang.

Tulang tilan lalu nyugu buok iya munyi ti endang diasoh iya. Peda udah nya tak nadai selambar agi buok Endu Engkejuang tinggal, nyau lasu meh buok iya. Meda utai bakanya, iya lalu beguai-guai sereta enggau sabak-sabak ngagai Endu Engkejemu, madah ka buok diri nadai agi tinggal selambar, udah abis disugu tulang tilan.

“Anang ke ngasoh panjai, ngasoh buok aku abis.” Pia ko Endu Engkejuang muchau kediri.

Meda utai udah nyadi bakanya, Endu Engkejemu lalu madah ke iya jalai nyugu.

“Ka agi ila wai, munyi tu nuan ngasoh tulang tilan nyugu buok nuan. Oh! Tulang tilan! Aku minta nuan nyugu buok aku enggau manah awak ka iya mansang panjai merundis galak melesak.” Pia ko Endu Engkejemu ngajar Endu Engkejuang. Ninga munyi nya, nya baru Endu Engkejuang nitih ka ajar Endu Engkejemu.

Enda lama udah bekau nya, Endu Engkejuang tepeda ke lelaki siko ti sigat serta gangam bendar dudok ba ruai sida Endu Engkejemu dia. Tama iya ke bilik, dia iya lalu nelai Endu Engkejemu.

“Oh wai! Sapa lelaki ke sigat bendar gamal dudok ba ruai kita dia?” “Eh wai! Utai ulih aku nempap ari limau rangan.” Pia ko Endu Engkejemu.

Ninga munyi nya Endu Engkejuang lalu beguai-guai pulai. Udah nya iya lalu nyau ngambi daun limau rangan, tang enda milih iya ke manah, iya ke chukup tuai, tak sebarang ambi. Laban ko ati iya, asal nya daun limau deka aja nyadi. Nya alai ambi iya daun ke tuai serta udah bisi charik udah diempa ulat. Daun nya lalu ditempap iya, peda lalu bebali nyadi aki tuai orang. Iya ga tuai, gamal iya ga jai ditambah ka agi enggau ikil nyau penoh tuboh. Meda baka nya Endu Engkejuang lalu mansang ngagai Endu Engkejemu madah ka penyai utai olih iya nempap ari daun limau rangan.

“Nadai aku nemu belaki orang ngenuai nya.” Ko iya madah ngagai Endu Engkejemu serta enggau sabak-sabak. “Kati alai enggi nuan sigat bendar gamal lalu enggi aku jai sereta tuai deh wai?” pia ko iya nanya.

“Kati ko enda pia, nuan ga enda milih-milih daun limau ke manah. Tak ambi sebarang ambi, dini enda bakanya deh utai ulih nuan.” Pia ko saut Endu Engkejemu.

Enda lama udah nya Endu Engkejemu seduai Endu Engkejuang bedurok mantun ba umai seduai. Leboh seduai iya mantun nyamok maioh bendar datai makai seduai iya. Meda bakanya Endu Engkejemu lalu bejako nganu bala nyamok.

“Naka ga kita tu nyamok, deka bendar kita makai darah aku. Uji ambi ka bini kita skali aku tu,” Ko Endu Engkajemu guut-guut bejako. Ninga munyi nya bala nyamok lalu naban ke Endu Engkejemu terebai ngagai rumah Raja Nyamok. Datai din, ba rumah Rajah Nyamok, Endu Engkejemu lalu nyadi bini Raja Nyamok. Nyau kelama udah nya, Endu Engkejemu nyau mansang tusah ati laban iya enggai nyadi pemakai ti diempa sida nyamok. Kitai sama nemu nyamok endang beridup ke darah mensia tauka jelu. Nya alai iya nyau enda nemu runding agi.

“Enti baka tu mati meh aku tu,” Ko Endu Engkejemu bejako kadiri. Taja iya empu enda enggau Raja Nyamok makai, iya selalu mela laki enggau naka pemanah. Iya enda ngayan ke penusah ati diri ba moa Raja Nyamok. Nyau puas iya ke berunding ka penusah diri, dia iya lalu ngaga diri sakit. Meda iya sakit dia deh Raja Nyamok bekenanas ngiga jalai ngubat iya. Sida iya lalu ngambi manang. Dia deh Endu Engkejemu lalu dipelian ka jaban, dipesaut ka likup, tang anang ke ngasoh iya gerai, ngasoh iya majak balat agi. Udah nya tadi Endu Engkejemu lalu ngaga diri mati.

Meda iya mati, lalu disenggai bala Raja Nyamok enggau cukup gaya serta enggau cukup basa. Diberi Raja Nyamok baiya enggau cukup ngepan, cukup pekayan bansa Iban. Nambah ka nya mega, iya dibaiya enggau setawak, enggau dumbak, enggau bendai, enggau menyarai, enggau engkerumong, enggau guong, enggau benda, enggau cukup tengkira. Nyau maia nganjong antu, Endu Engkejemu lalu dianjong bala nyamok ngagai pendam. Datai din, Endu Engkejemu enda ditumbak, tang diengkah ka sida iya ba atas panggau ke endang udah digaga sida.

Kabuah alai iya enda ditumdak, laban endang nitih ka baka adat Raja Nyamok, samoa turun menurun Raja enggau bini sida iya enda ditumbak enti leboh sida bisi mati, tang diengkah ka ba atas panggau.
Lepas nya samoa bala orang ti nganjong antu lalu pulai karumah. Leboh sida udah pulai samoa, Endu Engkejemu lalu ngesai ka diri angkat lalu ngesai ka kain ke dikena Raja Nyamok malut tuboh iya. Udah bungkus tubuh iya tebuka ari tuboh iya, iya lalu pulai ngagai rumah iya empu, lalu mai samoa utai ti udah diberi Raja Nyamok ke baiya iya. Nyau baka ke pindah gaya pendiau Endu Engkejemu empa pemaioh utai dibai iya. Datai iya dirumah sida, orang lalu begau ka utai ti dibai iya. Bala sida sarumah lalu nanya iya, dini alai iya bulih utai ngemaioh nya. Iya lalu madah ngagai sida, samoa utai nya olih iya belaki Raja Nyamok.

Ninga rita nya, Endu Engkejuang laban iya enggai alah laban orang lalu sengit-sengit, lalu nurun ka umai, minta bai nyamok awak ka bolih pengeraja baka enggi Endu Engkejemu. Datai iya dumai endang baka selama, maioh nyamok nutu serta makai iya. Meda bakanya iya lalu bejako. “Eh nyamok! Deka bendar kita makai aku tu. Ambi ke bini kita skali aku tu nyah.” Ko iya.

Ninga munyi nya, nyamok lalu naban ka iya pulai ngagai rumah Raja sida iya. Datai din Endu Engkejuang lalu diambi Raja Nyamok ka bini iya. Nyau maia orang ti berapi apa indah, Endu Engkejuang lalu begiga ka beras, tang iya nadai nemu beras seleka. Samoa benda enggau tibang dipeda iya penoh laban darah magang. Kati ko enda bakanya, nya ga endang pemakai nyamok, baka padi ti endang pemakai kitai. Laban iya ke enda liat ati baka Endu Engkejemu, iya lalu ngeransi laki iya Raja Nyamok, ko iya, “Nadai apai aku kala ngajar aku makai darah baka kita tu. Ukai orang tau enggau begulai sejalai baka kita tu.”

Ninga ransi bini iya munyi nya Raja Nyamok lalu ringat sereta pedis ati ngagai Endu Engkejuang. “Nuan tu meri aku malu ba moa seribu, sereta lalu mechat pemakai kami, nya alai nuan kena ukom, dibuai ari menoa tu.” Ko Raja Nyamok nganu Endu Engkejuang. Ka pengujung nya tadi Raja Nyamok lalu ngasoh anembiak iya nanchang kaki-jari Endu Engkejuang lalu narit iya ngagai menoa sunyi didalam kampong din. Iya lalu ditinggal ka nyamok didalam kampong kadiri, udah nya sida lalu pulai karumah. Nyau kapuas tudah Endu Engkejuang ke engkasak kakiba, engkasak kakanan, nya baru tanchang jari enggau kaki iya tebuka serta lalu merubus ari tuboh iya. Iya lalu beguai-guai mulai ka diri ngagai rumah sida empu enggau naka pemedis ati. Tubuh iya nyau abis malui sereta generam bekau pantang bala nyamok. Datai iya dirumah, sida sarumah lalu begau meda iya nyau nadai temu gamal agi. Anang ka bulih utai mesai bulu mata, nyema jako, kain ba punggung enggau baju ba tubuh deh abis ridang.

Ka pengujung iya, jerita tu tau bendar pulai ngagai ajar kena kitai ngadu ka pengelikun pendiau diri, lebih agi ba sanentang sida ka agi dara biak, ke benong agi belajar dalam sekula secondary. Enti kita ngerja pengawa sakula, kita anang enda ngerja pengawa kita enggau manah. Anang semina ngudah serta muntang ka pengawa diri empu pia aja enggai ka jemah ila, pendiau tauka pengidup kita pan bakanya. Adu ka pendiau serta perangai kita nitih ka pemandai ti ulih kitai ari skula.

ENSERA ASAL PENATAI APAI ALOI:

Nyadi cherita Apai Aloi bepun ari indu siko ke nama Rutih. Nyadi Rutih tu diau enggau sida apai indai iya di menoa sida di Nanga Engkaramoh, ari ili Gellong. Iya belaki Tunang Rebuam. Tunang Rebuam tu diau ba lobang batu, nadai rumah. Tunang Rebuam nya ke nyadi Antu Nguap. Nyau kalama ke begulai, dia deh Rutih nyau betuboh bisi, lalu beranak ka anak indu ke benama Sarai.

Leboh iya nyau dara dia iya deka turun ka temuda deka ngali bunga. Apin iya mupok dia indai iya berat-rat enda ngasoh iya ngambi bunga ke ba pun tapang, laban iya enda nemu penatai bunga nya. Tang leboh Sarai datai di temuda dia iya nemu panggal benih sida nadai agi, tak samina telesak bunga ke agi bisi dia. Ensepi diri enda bulih bunga ka di bai pulai, dia iya lalu mai bunga ke ba pun tapang, iya ti enda di asoh indai iya bai. Maioh bendar macham bunga dia baka bunga limau enggau bunga setangan. Udah iya mai bunga dia iya ninga utai tak ngenjing beguru, nadai utai ngemalat nya. Ka iya ngumbai nya ribut nadai ga iya meda kayu beguat; kumbai iya tanah berenyang ukai ga nya. Rari iya belanda-landa, dia deh bunga iya bisi berayan. Datai iya di rumah nadai ga iya ninga utai ke beguru nya agi.

Antara tiga malam udah nya dia iya bisi digayap orang. Orang ngayap nya nadai di kelala, meda pan nadai meh iya kala. Iya lalu nanya.

“Sapa nuan tu? Kukut nuan tu tak asai lungga, tunjok nuan asai laja, betis nuan tu asai belia?”

“Aku meh tu, nemuai ngagai nuan laban nuan udah ngambi bunga kami, udah megai taju aku. Aku tu datai tu deka bebini nuan,” ko orang nya.

“Sapa nama nuan tu deh?”, ko Sarai.

“Aku tu meh ke benama Gadu“, ko orang nya nyaut iya.

“Ari ni penatai nuan tu deh?”, ko Sarai.

“Jaoh, datai ari tisau langit kuning”, ko Gadu madah ngagai iya.

Gadu lalu madah ka diri deka jadi enggau Sarai enti apai indai iya satuju. Sarai lalu angkat nanya indai iya enti sida iya satuju enggau jako Gadu. Sida indai Sarai nadai maioh jako pasal seduai iya ke deka jadi amat ga seduai iya ka jadi manah enggau pangan diri. Lalu jadi melaki bini meh Sarai enggau Gadu tu tadi.

Nyau kelama ke begulai dia seduai lalu beranak, beranak ka anak lelaki nadai utai ngenyigat nya gamal, baka apai iya empu. Dia apai iya meri anak iya nama Raja Beginda. Leboh Raja Beginda nyau besai, dia iya nyau rangka, bepakai ka macham-macham utai, baka ansang keli, kelupa baung nya ke ngujong ka iya nyadi lap. Meda iya bakanya iya lalu diberi orang nama Tambap. Leboh Tambap nyau besai dia apai iya Gadu madah ka diri deka pulai ngagai menoa sida di tisi langit, laban iya samina tau diau tujoh tahun enggau sida dia. Apin iya pulai dia iya ninggal ka benda Indai Ranai sigi, sirat luai selambar, badi andai sabilah, sumpit sapuchok enggau selapok marik siti, ka Tambap. Udah nya iya pan lalu mupok pulai ngagai menoa iya di Perenching Tisi Langit Kuning baka Siring Tangkong Burong, Selesa Ujan Nyala Baka Tangga Gempong Jabong.

Nyau kelama apai iya udah pulai ari menoa sida, Tambap pan nyau besai bendar. Ari siti dia iya madah ngagai indai iya, diri ti deka nemuai ngagai apai iya. Indai iya ngasoh, tang enda tau lama, ngambi ka sabulan pia, laban nadai orang enggau iya betupi. Hari iya ke mupok, dia iya lalu beradu. Pasok ka iya simpai kima iya enggau sirat luai. Ambi iya badi andai lalu tangkin iya, udah nya baru iya ngambi sumpit. Udah iya abis bekemas, baru iya mupok ari menoa sida di Nanga Engkaramoh, ari ili rumah sida Tutong kai di Gellong. Bejalai iya sehari-hari nya. Nyau lemai hari baru iya datai ba kaki Gunong Nyemugut. Iya pan lalu bemalam dia malam nya.
Nyau pagi hari siti baru iya mupok majak ka pejalai diri niki Gunong Nyemugut nya. Kira tengah hari, dia iya bisi ninga orang ngagau.

“Oh ngetu Tambap”, ko orang nya dinga iya.

“Enda aku ngetu, laban beguai bendar”, ko iya.

“Nya pan ngetu enda lama”, ko orang.

“Sapa kita nya deh?”, ko Tambap.

“Aku tu meh ke dikumbai orang Bunsu Ruai, Dara Bajik kelandik Kaban Temuai, Dara Bunsu Mandi Tumu Besepar Rangkai”, ko orang nya madah ka nama diri ngagai iya. “Lalu ngetu”, meh ko orang nya nan ka iya.

“Enggai aku ngetu”, ko iya.

“Enti nuan enggai ngetu nuan puni ila, puni tusu madu aku baka lua burong kenyalang, puni kuyu aku baka telu manok kepayang”, ko Bunsu Ruai.

“Enda”, ko iya, “Tusu nuan enda manah baka tampok kepayang padong, kuyu enda manah balut tai manok lintong”, ko iya. Iya pan lalu nyau mupok.

Bejalai iya sahari-hari nya, iya pan datai ba tuchong bukit sigi. Ba tuchong bukit nya iya meda maioh bendar orang berumah. Tang iya niki rumah orang ke sapintu salawang-lawang, siko sa-atap senukang. Leboh iya datai ba kaki tangga dia iya lalu nyapa nanya ka penyadi rumah?

“Jadi rumah kita ini?”, ko iya ngagau.

“Jadi uchu, niki meh, tang nadai orang enggau nuan di ruai dia, lalu ka bilek kitu”, ko orang nya nyaut iya.

Datai iya di bilek iya lalu nudok kai diri. Indai tuai orang nya lalu ngelalu kai iya sereta lalu nanya kai penatai iya.

“Ari ni penatai nuan tu deh uchu?”, ko indai tuai orang nya nanya iya.

“Aku tu datai, ari menoa kami di Nanga Engkaramoh ari ili Gellong”, ko iya.

“Nama main nuan deh?”, ko orang nya ga nanya.

“Aku tu ka nemuai ngagai apai aku kai benama Gadu”, ko iya.

“Oh Gadu nya anak menyadi aku”, ko ini orang nya.

“Oh sapa nuan tu deh?”, ko iya ga nanya.

“Aku tu meh Ini Jelebok. Ti nuan anak Gadu, uchu aku meh nuan tu”, ko ini orang nya bejako enggau Tambap. Ini Jelebok pen lalu ngangau kai anak iya kai betenun di sadau kai benama Nain Kai Bekain Mali Rimpi, Besandol Andol Kai Besanggol Lepi Sakali. Endu Nain pan nurun ga ari sadau.

“Oh bisi datai nuan anak!”, ko iya bejako enggau Tambap.

“Bisi meh ibu,” ko iya.

Nyadi Tambap lalu bemalam dia malam nya. Hari nyau jauh lemai tindok mega sida. Pagi siti apin iya mupok, dia iya lalu nanya ka nama menoa nya ngagai ini iya ke benama Ini Jelebok. Ini iya madahka menoa nya dikumbai orang Bukit Tandok Labong. Kejang iya deka mupok dia ini iya meri iya ubat sangga bunoh ke lalu di-unsut ini iya ba tuboh iya ka bekal iya bejalai. Lepas nya baru iya ngejang ka menoa sida ini iya. Bejalai meh tudah Tambap sahari-hari nya, nyau tengah hari engkarabak alai iya tak nyerungkong rebah tetanam tunsang. Rebah kanan saka enteran, rebah kiba sakal ulu tulang, rebah ka moa saka tanda paya lebang. Tak lalu luput meh nya dia.

Leboh iya ke luput, dia deh Bunsu Langau tak bira ba nyawa, ba pending, ba idong iya. Dia iya pan lalu tedani laban tai langau. Leboh iya dani, iya meda orang tak ketawa ka iya. Nyadi nama Bunsu Langau nya Dara Nyerida Tau Tepat, Kumang Tukang Tau Keramat. Lalu ka di sumpit iya Bunsu Langau.

“0h anang nuan nyumpit aku”, ko indu nya bejako. “Ila kami meri nuan ubat batu pending enggau ubat batu bidik ngambi ka nuan bidik baka kami”. Lalu di-unsut orang nya batu pending enggau batu bidik ba jari iya. Benong ngunsut ka batu ubat nya tadi, dia orang nya lalu bejako.

“Tu bakanya ga Tambap, nama agi didinga panjong, agi nuan ninga jako orang, baka kami ke nemu buot”, ko orang nya.

Udah nya baru Tambap ngejang ka menoa nya lalu mupok bejalai baru. Bejalai iya sahari-hari nya, alai iya tak rembus ba rumah orang di tuchong bukit nya. Iya lalu bejalai nuju kaki tangga orang nya. Datai iya dia iya lalu nyapa.

“Jadi rumah kita tu?”, ko iya ari tanah.

“Jadi meh uchu”, ko orang nya. “Lalu niki ka rumah kitu ka”. Ngenjing besalalut ga tudah indai tuai orang nya ngelalu ka iya.

“Ari ni penatai nuan tu deh uchu, lalu ka kini ka nuan tu deh?”, ko orang nya nanya iya.

“Aku tu datai ari Nanga Engkaramoh ari ili Gellong lalu ka nemuai ngagai apai aku Gadu ke diau di Perenching Tisi Langit Kuning baka Siring Tangkong Burong, Di Selesa Ujan Nyala Baka Tangga Gempong Jabong”,ko Tambap madah ke diri ngagai indai tuai nya.

“Oh uchu kami meh nuan tu. Gadu nya anak menyadi aku. Nyadi aku tu meh ke dikumbai orang Antu Ribam”, ko indai tuai orang nya. Iya lalu ngangau ka anak iya Dayang Ketupong Dayang Lingkau, Endu Berunu Pandau Ligau, ke betenun di sadau. Lalu nurun meh ga anak iya ari sadau lalu berandau enggau Tambap dia. Tambap lalu bemalam ba ini iya dia malam nya. Nyau keleju ke udah berandau, dia ini iya madah ka nama menoa nya ngagai iya. Nyadi menoa tu dikumbai orang Bukit Alun Tenun.

Pagi siti lalu mupok meh tudah Tambap nampong pejalai iya ke deka nemuai ngagai apai iya. Tang enda mukai mukai deh iya tak betemu enggau Antu Lembak Puki, apin tentu jauh ari rumah ini iya Antu Ribam. Dia antu Lembak Puki nya tak ka manching iya kemi. Takut bendar tudah Tambap meda utai bakanya. Iya pan lalu nikal ga ngagai rumah ini iya Antu Ribam. Datai iya dia, iya madah ngagai ibu iya pasal Antu Lembak Puki ke deka manching iya. Ibu iya lalu meri iya batu pukak.

“Enti nuan bidik, ai kemi antu nya lagi tau jadi batu, tang enti nuan enda bidik tak basah ngapa meh nuan lagi laban kesing iya”, ko ibu iya madah ngagai iya.

Udah nya iya nyau mupok mai batu puki nya tadi. Tang nasit bendar ga antu nya nadai agi ngachau iya.

Bejalai kenu tudah Tambap sahari-hari nya, nyau lemai hari iya datai ba kaki bukit. Agi jauh, dia iya meda maioh bendar rumah orang, ngenjing baka daun bukau empa pemaioh, tang meh nadai betampong panjai. Dia iya lalu nuju rumah ti betampong tiga pintu. Datai iya ba kaki tangga iya lalu ngangau.

“Jadi rumah kita?”, ko iya.

“Jadi meh Igat,” ko orang nyaut iya. “Lalu, niki meh”.

Nyau lama ke berandau, dia apai tuai lalu nanya ka penatai iya.

“Ari ni penatai nuan deh Igat? Lalu ka kini ka nuan tu deh?”, ko orang nya nanya iya.

“Aku tu datai ari Nanga Engkaramoh ari ili Gellong lalu ka nemuai ngagai apai aku Gadu”, ko iya nyaut orang nya.

“Oh petunggal aku Gadu nya. Kaban meh kitai tu. Nyadi aku tu Bunsu Kamba”, ko orang nya madah ka diri ngagai iya.

Nyau ka pemanjai randau dia iya nanya ke kabuah sida dia enda betam¬pong panjai.

“Ukai utai”, ko orang nya. “Agi menya kami tu bisi ka di-kayau orang, Nya alai kami enda betampong panjai. Enti sema kami ka sebuah rumah di tunu orang, sebuah ga agi tinggal, enti sebuah di tunu, sebuah ga agi”, ko orang nya madah.

“Kati alai orang deka ngayau kita deh?”, ko iya nanya.

“Kami menya bisi ngelalai ka utai baka tajau, chapak, mangkok, tekang mas bisi mesai tuboh kijang, ba pun kayu melebu. Kati nuan ngelala kayu melebu?”, ko orang nya nanya iya.

“Enda tentu ngelala”, ko iya. “Ngelala-ngelala ka bakanya meh. Batang iya ka burak-burak lalu bandir iya ka mipis-mipis, daun iya begalong. Pia ko orang ke nusoi ngagai aku”, ko iya nyaut.

Nyadi malam nya iya bemalam dia. Malam nya orang lalu ngumbok iya enggau sida iya ngiga kayu melebu pagi siti.

Nyau pagi siti tumu sida iya mupok ngagai puak kampong kin ka ngiga kayu melebu. Maioh ga kayu melebu ditemu sida, tang meh agi mit magang. Nyau kelama baru sida iya tetemu ka iya ke nyau dua pemerap pemesai batang. Datai dia sida lalu belaboh ngair-ngair pun kayu nya ngiga utai. Dia sida tetemu ka maioh macham chapak ke manah baka chapak kerugi, chapak kemuja, pinggai beturus, pinggai tebal enggau maioh utai bukai ke manah. Tang alah ngagai hari nyau lemai, tekang mas ke mesai tuboh kijang lalu nadai temu. Sida pan lalu pulai. Lemai nya udah badu makai dia iya madah ka diri enda ulih enggau sida iya agi ngiga pagi siti laban lalu ka nerus ke pejalai iya. Mina chapak enggau pinggai ulih iya dia.

Pagi siti iya lalu mupok. Apin iya ke mupok, dia Bunsu Kamba ngasoh anak dara iya ke benama Endu Temuku Tampok Lemba, Dayang Ketupang Bunga Taya nganjong Tambap. Bejalai seduai iya ngejang ka menoa Bunsu Kamba lalu rembus ba pun kara. Dia Tambap lalu nyumpit. Burong ke ulih iya nya diberi iya ngagai anak Bunsu Kamba. Nyau kelama seduai iya ke udah nyumpit dia anak Bunsu Kamba madah ka diri naka nya nganjong iya. Seduai iya lalu besarara dia. Manah ga anak Bunsu Kamba nya enda beduan iya mai iya tesat.

Bejalai iya ari pun kara nya, alai iya tak rembus ba danau siti. Ka iya nyemerai ka seberai, takut ga ati iya, laban ai nya ka dalam-dalam mimit. Dia iya lalu besampi munyi Menani Manang Chelong, mutap munyi kedadap telok kampong.

“Ni petara kai ngemata kai aku, Ke ngadu ka aku? Aku tu ka nemuai ngagai apai aku Gadu”, ko sampi tudah Tambap.

Enda lama udah nya alai datai burong undan ke madah ka diri deka nyangkai ka iya ka seberai. Iya lalu nepan ba belakang burong undan nya. Nying entachang burong undan nya mai iya terebai ka seberai nya ti ngasoh sapiak tuboh tudah Tambap nya basah. Datai di seberai iya lalu bejemboi. Leboh ka bejemboi, dia iya ninga orang tak reding-reding. Jauh ga orang nya ari iya, tang laban iya ke bisi batu pending ke diberi Bunsu Langau ulih ga iya ninga. Dia iya ninga orang bejako.

“Nama pengawa nuan dia wai?” ko orang nya dinga iya.

“Aku tu ngelalai ka telu aku sapuloh igi tu enggai ka di empa Ini Gumba, enggau Aki Gumba, enggai nyadi enda di-lalai ka”, ko orang nya nyaut didinga iya. Udah nya mansang Tambap ngagai tunga orang ka bejako nya. Datai iya dia iya meda Bunsu Beluku ke lalu nanya iya.

“Ka kini nuan Tambap?”, ko Bunsu Beluku nanya iya.

“Aku tu ka nemuai ngagai apai aku, lalu aku tu minta anjong nuan”, ko Tambap nyaut.

“Enggai aku”, ko Bunsu Beluku nyaut.

“Enti nuan enggai aku ka madah ka telu nuan sapuloh igi ke di-lalai ka nuan tadi ngagai Aki Gumba”, ko iya nyaut.

Nyadi tudah Bunsu Beluku tu tadi, laban sayau ka telu diri diambi Aki Gumba, deka mega iya nganjong Tambap. Iya lalu dianjong Bunsu Beluku alah nyau semak rumah Aki Gumba. Dia iya madah ka diri naka nya nganjong Tambap, laban takut ka diempa Gumba. Ninga redup tungkat Gumba bala Beluku lalu terejun ka ai.

Udah Bunsu Beluku mulai ka diri. Tambap pan gadai-gadai ga bejalai nuju rumah aki iya. Niki iya peda iya dugau-dugau aki iya ba ruai. Pala baka rintong, mata baka buah terong, ngeli iya baka lengki di kaki wong, nadai utai ngemesai nya, pala iya ga lalak. Sereta meda iya aki iya lalu ngelalu ka iya.

“Lalu uchu lalu”, ko iya. Iya lalu ngangau ka bini iya.

“Untong tua lemai tu baka beliong ulih ngamboh, betuah tua lemai tu baka peredah ulih ningkoh. Bisi datai uchu tua lemai tu”, ko Antu Sepapa nya gaga ka Tambap ke bisi datai lemai nya. Lalu pansut ga bini Antu Sepapa nya ari bilik lalu merap Tambap gaga ka iya ke bisi datai lemai nya.

“Kini ka nuan tu deh uchu?”, ko bini Antu Sepapa nanya Tambap.

“Aku tu ka nemuai ngagai apai kau Gadu”, ko iya nyaut.

“Enti Gadu nya anak petunggal kami”, ko ini iya nyaut.

Nyadi Tambap tu lalu asoh Antu Sepapa diau ba seduai iya dulu, apin asoh seduai melaki bini mupok. Diau dia meh tudah Tambap. Sekumbang iya ke diau dia, dia iya meda maioh bendar salai, kasam tang meh balat bendar gamal. Nambah ka nya mega, Antu dua iko nya tak nadai makai asi. Apin bangat lama iya udah diau dia, alai Antu Sepapa nya madah ka seduai melaki bini deka tindok. Seduai tu endang ka baka, tindok sapiak bulan lalu dani sapiak bulan ga. Apin seduai iya tindok, dia seduai iya madah ka kasam enggau salai ke empa Tambap sekumbang seduai iya tindok nya. Antu nya pan lalu meri iya alu siti kena ngerak seduai iya enti bisi tuntong penusah. Udah nya baru seduai iya lalu tindok.

Kira bisi tiga malam meh antu dua iko nya tindok alai tudah Tambap di tuntong penusah. Enda mukai-mukai ga iya tindok mai kasam enda jauh ari iya ke tindok. Ensium utai ke manah bendar bau, datai tikus belanda tak lalu ngigit tungkul idong iya ti ngasoh idong iya lalu rumpong. Nyau rauh-rauh tudah Tambap laban idong iya ke nyau nyengut. Dia iya lalu ngambi alu lalu di entong iya ngagai dada antu nya ngerak seduai iya. Dani seduai iya lalu diadu-adu seduai iya tungkul idong Tambap. Nyau ke lama jadi ga tungkul idong iya, tang meh lubong idong iya agi bedau siti aja, tak agi sedandang, nya ti ngasoh iya lalu idol jako selama iya. Kira dua tiga hari udah nya alai iya madah ka diri deka lalu nerus ka pejalai iya nemuai ngagai apai iya.

Pagi siti lalu mupok iya ngejang ka menoa Antu Sepapa nya ke alai idong iya sedandang. Bejalai iya sahari-hari nya ka diri-diri. Nyadi menoa nya tak entap baka padang tang meh kayu tak bebesai magang. Nyau ka lemai hari alai iya rembus ba sungai siti ke alai iya betemu enggau indu siko ke benong mandi. Indu nya tak ngena selong semua, bulu pala iya baru beselat uban. Indu nya lalu mai iya sama mandi. Tang iya enggai laban bulu iya chelap. Leboh indu nya ke mandi dia seduai iya berandau. Iya lalu madah ka diri datai ari Nanga Engkaramoh ari ili Gellong, mansang nemuai ngagai apai iya Gadu. Tekenyit indu nya ninga iya tak anak laki iya empu. Indu nya lalu madah ka diri bini Gadu. Udah iya tembu mandi, indu nya lalu mai iya niki ka rumah. Datai di rumah din gaga bendar apai iya Gadu meda anak iya nyau besai, ke lalu bisi datai nemuai ngagai iya. Iboh bendar apai iya enggau indai tiri iya ka iya ke nemuai nya, nyau baka ke endang anak iya empu. Pemakai pan manah ga enda baka ka ba rumah Antu Sepapa tang meh jako iya tak lalu idol.

Kira empat hari iya udah diau enggau apai seduai indai tiri, iya pan lalu madah ka diri deka pulai, laban nyau irau ka indai iya ke tinggal ke diri di Nanga Engkaramoh. Tang meh apai seduai indai tiri iya agi nan ka iya ngambi dua hari agi. Lemai iya ke madah ka diri deka pulai nya, dia deh enda mukai-mukai ga tak bemunyi ngingit. Ngingit tu Manang Mengayan gila ka ngerebok mata orang enti orang tindok. Leboh ngingit ke bemunyi, dia indai tiri iya lalu ngangau madah ka sida iya agi dani.

“Agi dani kami tu, agi dani”, ko iya.

Nyadi Tambap ninga ngingit deka bendar ngerebok mata orang ti tindok takut endar ati iya. Nya ke lalu mun ke iya ti takut endar ka ngingit.

Nyau kedua hari udah nya alai iya pan madah ka diri enda tau enda mulai ka diri. Apin iya pulai dia apai iya Gadu ngasoh iya milih ni duku ti dikerindu iya, laban iya empu endang tukang kamboh. Tang meh Tambap samina kamai keris sabilah aja, ka penguju ko iya, selapok ujok bok siti enggau baju kechepak salambar. Ari indai tiri iya samina minta siti sendok. Iya enggai empu ubat jedian. Nyadi sendok nya, ko indai tiri iya enti agi tujoh malam enda lapar enti udah nilat ujong sendok nya. Udah iya bekemas enggau beberi ka utai, nya baru apai enggau indai tiri iya nganjong iya ngagai pangkalan. Nyadi iya ke pulai tu nengah ai, merau ngena perau jong sebuah, kira panjai tiga enggau buka iya sedepa.

Udah nya lalu mupok meh tudah Tambap tu berarat kili. Apin lama endar udah nya, alai iya betemu enggau burong undan.

“Oh nuan Tambap, bisi pulau batu sigi nyin, anang nuan mansa nya enggai ka kudi. Pulau Kudi Mayau nya”, ko burong undan madah ngagai iya. Tang meh iya tak baka ke enda iboh. Lalu bepeling-peling dia meh iya. Keleju ke bakanya alai perau iya tak tepangka ba batu nya. Tak lalu kudi meh hari dia. Nyau baka ke deka tungkup perau Tambap laban gelumbang. Nyau udah pama agi hari, alai iya tak rembus ba Nengeri Ribai Dayak. Ba pangkalan nya bisi bandong sebuah. Perau iya lalu di sangkai ka iya ba tumpang bandong nya, laban hari ke agi jai enda ulih disangkai iya ka tebing.

Semalam nya dia meh tudah iya ninga Laut ke empu bandong nya bejako. Nyadi bala Laut nya datai ari menoa Raja Suran, ari baroh Gunong Mesuat. Sida iya mansang ka “belujum” ka buah lebih seratus sapuloh leka ngelaban orang di nengeri Ribai Dayak. Enti orang dia ulih nyangka penyampau buah nya, bandong sida Laut nya di empu orang nya. Tang enti sangka sida salah, sida laut bempu Kayu Sagu Alu, ia nya kayu pengajih siti ti bisi tumboh ba menoa sida dia. Tak nama utai deka di pinta kitai ulih magang laban kayu nya ngada ka semua utai nya. Angkat ninga deh Tambap jako Laut ke madah ka buah lebih sida iya seratus sapuloh leka nya. Pagi siti iya lalu tumu niki ngagai jembatan ke enda jauh ari nya ke alai orang deka belujum. Iya ke mupok ka tebing nya ngena selapok ujok bok enggau baju kechepak. Iya ga tinggi iya ga selapok ringka, iya ga besai iya ga bebaju taya. Sigat bendar gamal iya.

“Lalu meh tuan”, ko bala Laut ngelalu ka iya. “Aram lalu belujum kitai tu”, ko orang bejako enggau iya.

“Nama reti belujum”, ko iya ngaga diri enda nemu.

“Belujum meh, enti nuan nemu penyampau buah lebih dalam guni tu nuan empu bandong kami, enti nuan enda nemu kami empu kayu Sagu Alu”, ko orang.

Dia iya lalu bepusin-bepusin ngena keris ke diberi apai iya. Iya endang agi ingat ka penyampau buah lebih nya.

“Saratus sepuloh leka!”, ko iya.

“Alah meh kami tu”, ko orang nya. “Nya alai bandong tu lalu di empu nuan meh”.

“Aku enggai empu bandong nya nadai di kena kita pulai”, ko iya. Iya semina ngambi barang temaga, reta baka setawak, engkarumong, dumbak ke lalu di-bantai iya ngagai perau iya. Udah nya iya lalu mupok ga ngejang ka menoa Ribai Dayak, ke alai iya bulih reta enggau mudah.

Nyau kelama iya ke udah bedayong, dia iya lalu datai ba menoa Batu Titi ke Bepampang Tujoh Nanga, Saka Ulak Jawa, Ai Beranti Tujoh Nanga. Iya lalu nyangkai ka perau iya ba jematan lalu terus bejalai ka rumah orang. Datai iya ba rumah dia alai iya betemu enggau Simpulang Gana.

“Oh lama udah tua enda betemu”, ko Simpulang Gana ngelalu kai Tambap.

“Au, lama endar meh tua udah enda betemu”, ko Tambap ga nyaut. “Nama main nuan tu tak bisi di menoa orang deh?”, ko iya nanya Simpulang Gana.

“Bakatu”, ko Simpulang Gana. “Aku tu suba bebini ngambi Endu Serentum Tanah Tumboh. Udah nya leboh kami dua udah nyundang pinang kami dua lalu nemuai ngagai rumah aka aku empu, Dayang Putong Kempat. Nyadi leboh iya mandi, dia iya tak mandi ari ili bini aku. Di rara aku enda ulih. Udah bekau nya isi iya tak lalu murok. Kami enda nemu ngubat iya agi, nya alai iya lalu di perarat ka. Iya lalu di apong Ini Manang ke lalu nempa iya baru. Iya pen lalu pulai bajik baru. Udah nya iya lalu dibeli Pati Melayu Puteri Bunsu ke empu menoa tu ngena Batu Pengajih ari Ini Manang. Nya alai aku ke bisi di temu nuan ditu”, ko Simpulang Gana becherita ngagai iya. “Nya alai sida tu”, ko Simpulang Gana nampong cherita iya, beperang ngelaban Raja Kumbang, tang lalu enda ulih alah ka, laban sida ke enda ta-irup ka ai salabu ke selalu di binti bala Kumbang. Enti nuan tak bisi runding ni enda pama!”, ko Simpulang Gana madah ngagai Tambap.

“Enti kita beguna ka penemu enggau tulong aku, deka ga aku enggau”, ko Tambap bejako enggau Simpulang Gana.

Malam nya Tambap lalu ngasoh sida ngumpul buah entawa maioh bendar, lalu di tabur sida ngagai kuta Raja Kumbang. Pagi siti bala Raja Kumbang lalu begau berebut ka buah entawa nya tadi, ngumbai buah entawa nya mas. Laban sida ke balat bendar berebut nya ti ngujong ka kuta sida lalu terumpang. Udah kuta sida iya terumpang nyamai bendar bala Tambap, bala Simpulang Gana tama ke dalam. Nya ti ngujong ka Raja Kumbang lalu alah, sereta lalu kena tangkap. Tang iya minta kasih ngagai sida Simpulang Gana anang munoh iya enggau kaban iya. Ka ganti nyawa sida iya, Raja Kumbang laban iya ke tukang, semaia deka meri Simpulang Gana perau, laban iya ke bisi Gadin penyarin dandang umai, bisi Meliba nyala nanga sungai. Bisi Mawing ngiling enda nginsap, bisi Mambu bebaju ke udu balat gerenyap nya orang kaban Raja Kumbang magang ke nemu ngereja samua macham utai.

Nyadi Tambap udah nya nyau bipar ka Pati Melayu Puteri Bunsu, laban ka udah enggau iya ngalah ka Raja Kumbang.

Angkat Tambap ari menoa Pati Melayu nya, iya lalu mudik Batang Gellong. Simpulang Gana lalu masok Nanga Sungai Limau Janting. Datai iya ba Nanga Engkaramoh, orang begau meda iya ke datai mai utai ngamaioh nya. Udah nya orang pan lalu mantai ka utai ke ulih iya nya. Gaga bendar indai iya meda penatai iya mai perengka enggau reta.

Apin lama iya ke udah pulai nemuai ari apai iya, ke alai iya bulih reta, dia iya lalu di asoh indai iya bebini. Iya bebini ngambi Chelegit, indu orang Gellong. Laban iya ke kaya taja pan jako iya idol, sida Keling, sida Sempurai enggau Pungga nadai jako. Rumah bisi ga iya, tiang teras magang. Nya iya lalu beranak ka sida Kumang Begok, Aloi, Atop, Imba. Laban nya iya lalu dikumbai orang Apai Aloi. Tambah mega pengawa iya tak jauh endar lain ari pengawa enggau penemu orang bukai ke menyana.